Ayera a aresta un homber di 70 aña di edad pa un hit-and-run cu a resulta den morto di tata di rapper Nicki Minaj. El a stop brevemente pa puntra e homber si e tabata OK, pero no a yama pa pidi ayudo, polis a bisa.
Charles Polevich ta enfrenta cargonan di bandona escena di un incidente y manipulacion di evidencia fisico den conexion cu e morto siman pasa di Robert Maraj, di 64 aña di edad, na Long Island na New York.
Polevich, ken ta pasa su tempo entre Long Island y Guam, unda e ta maneha un negoshi di consulting ambiental, ta liber bao fiansa despues di un procesamento na corte na Nassau County. Como resultado di su aresto a suspende su rijbewijs, a dun’e orden pa entrega su paspoort, y un hues a bisa cu e no por bandona e estado.
“Absolutamente e tabata na altura di loke a pasa”, detective di polis di Nassau County, Lt. Stephen Fitzpatrick a bisa den un conferencia di prensa. “El a baha di auto y a mira e fayecido, subi auto back y tuma e decision consciente di sigui bay na luga di yama 911, na luga di pidi un ambulance pa e homber”, Fitzpatrick a bisa. “El a bay cas y sconde e vehiculo. E tabata bon na altura di loke el a haci.”
Abogado di Polevich, Michael Scotto, a describi loke a pasa como un accidente tragico y a bisa cu su pensamentonan ta cu famia Maraj.
Un auto a dal Maraj pa 6:15pm diabierna mientras e tabata cana na Roslyn Road na Mineola. A hib’e hospital unda a pronunci’e morto diasabra.
Minaj, di 38 aña di edad, a nace cu Onika Tanya Maraj na Trinidad y a lanta na ciudad di New York, na Queens. E no a duna un declaracion tocante morto di su tata. Mama di Minaj, Carol Maraj, a bisa Newsday cu e famia ta alivia cu ta acusando un sospechoso di e morto. “Mi ta hopi, hopi, hopi contento pa e aresto”, Carol Maraj a bisa.
