Facebook ta revela controlnan nobo pa mucha cu usa nan plataformanan

(AP) – Como resultado di e testimonio cu a critica e plataformanan di Facebook, y a declara cu nan ta causa daño na muchanan, e gigante den rednan social lo introduci varios actualisacion incluyendo un alerta cu lo insta e hoben pa tuma un break durante uso di e aplicacion pa comparti potret Instagram, y di “nudge” e hobennan si nan tin basta tempo ta mira e mesun contenido cu no ta contribui na nan bienestar.

Facebook, basa na Menlo Park, California tambe tin den plan e introduccion di controlnan nobo pa adultonan cu lo ta opcional, pa e mayornan of personanan responsabel por supervisa kico e hobennan ta haciendo of mirando online. E iniciativanan aki ta bini despues cu Facebook a anuncia fin di luna pasa cu nan lo pausa e trabao pa Instagram for Kids. Pero criticonan ta bisa cu e plan ta falta hopi detaye y nan ta duda cu e actualisacionnan aki lo ta efectivo.

“Nos ta constantemente purbando di mehora nos productonan,” Clegg a conta Dana Bash riba “State of the Union’ diadomingo. “Nos no por, cu un habri y cera di wowo haci tur hende su bida perfecto. Loke nos por haci ta duna nos maximo esfuerso den mehora nos producto, pa nos producto por ta sigur y pa tur hende por disfruta di esaki.”

Clegg a bisa cu Facebook a inverti 13 biyon dollar durante e ultimo añanan pa purba sigura cu e plataforma ta sigur y cu e compania tin mas di 40,000 persona trahando riba e problemanan aki.

E entrevistanan a bini despues cu ex empleado Frances Haugen, un cientifico di datonan anterior di Facebook, a bini dilanti congreso siman pasa pa acusa e plataforma di rednan social di fracasa di haci cambio na Instagram despues cu investigacionnan interno a demostra daño na cierto hobennan y di falta di honestidad den nan pelea publico den contra di odio y mal informacion. Haugen su acusacionnan tabata soporta pa cien di miles di pagina di investigacion interno y documentonan cu el a copia den secreto prome cu el a sali for di e compania su unidad di integridad civil.

Josh Golin, director ehecutivo di Fairplay, un vigilante pa e industria di muchanan y promocion di media, bisa cu e no ta kere cu e introduccion di e control nan aki pa yuda mayornan supervisa e hobennan lo ta efectivo pa motibo cu hopi hoben ta crea cuentanan secreto. E tambe tabata dudoso di con efectivo e “nudging” lo ta, y si di berdad esaki lo causa cu e hoben lo tuma un break of stop di mira e contenido dañino. El a nota cu Facebook mester mustra exactamente con nan lo implementa esaki y ofrece investigacion cu ta demostra cu e controlnan aki ta efectivo.

“Tin rason grandi y tremendo pa tin duda tocante esaki,” el a agrega. Tambe Golin a conta cu reguladornan mester restringi kico Facebook por haci cu nan algoritmo.

Golin ta di e opinion cu Facebook mester cancela e proyecto di Instagram for Kids.

Ora Clegg a ricibi critica di ambos Bash y Stephanopoulos den entrevista separa tocante uso di algoritmo y e amplificacion di mal informacion prome cu e manifestacion di dia 6 di januari el a responde cu si Facebook lo a kita e algoritmo, hende lo mira mas, no menos mensahe di odio, y mas, no menos mal informacion.

Clegg a bisa ambos anfitrion cu e algoritmonan ta sirbi como “netnan grandi di cierto mensahenan of publicacionnan no desea of dañino.”

Senador Democratico Amy Klobuchar di Minnesota, ken ta cabesante di e Senate Commerce Subcommittee pa e topiconan di Competition Policy, Antitrust y Consumer Rights, a bisa Bash den un entrevista separa diadomingo cu a yega tempo di actualisa e leynan tocante privacidad di mucha, y di ofrece mas transparencia den e uso di algoritmo.

“Mi ta aprecia cu e ta dispuesto di papia tocante e temanan aki, pero mi ta kere cu e tempo di papiamento y combersacion a caba,” Klobuchar a bisa tocante Clegg su plan. “E tempo di actua ta awo.”