Ayera un hecho importante den historia di Fatima College na Dakota a sucede cu lo trece un clima agradabel di estudio, tanto pa e docentenan como pa e muchanan di e scol basico aki.

Tur nan klas a haya airco danki na e donacion haci pa e Club Chines y Asociacion di Comerciante Chines na Aruba. E acontecimento aki a conta cu presencia di presidente di e asociacion aki, William Cheng, directora di SKOA, Anuesca Baly, cabesante di Fatima College, Franklin Richardson y tambe un grupo di docente.

Juff. Tahira Lopez di klas 4 a cualifica e dia aki como uno “hopi special y un logro masha grandi cu nos ta celebra.” E tabata un pakete completo: renobacion di nan sistema di coriente y airco pa cada un di nan shete klas.

E aña aki a bira un excepcion compara cu e añanan anterior vooral den e temporada aki di horcan cu ta produci hopi calor. Te hasta den pasado nan a yega di manda e muchanan cas debi na e calor insoportabel aki. Aña pasa buscando un solucion nan a cuminsa cu actividad pa colecta fondo pa medio di benta di rifa cu ayudo di sponsornan. E placa colecta a yuda nan pa renoba nan sistema di coriente. Pero e otro reto a bira e airco pa 7 klas.

Donacion airco

Ta akinan unda Club Chines y Asociacion di Comerciante Chines a drenta den accion pa mustra un biaha mas nan compromiso cu nos comunidad. Ya caba nan a hacie cu Cacique Macuarima School ora cu parti di nan instalacion a kima. Y durante e pandemia di Covid tambe nan a yega di bin cu dos container di cuminda como donacion pa yuda e famianan registra den Fundacion Pa Nos Comunidad.

E biaha aki Juff. Joann Simon di klas 6 a acerca Sr. Cheng pa wak con nan por yuda Fatima College pa su soño di por tin airco bira un realidad.

Di biaha el a mustra su boluntad y esunnan di nan miembronan cu nan kier yuda cu e bunita obra aki. Willem Cheng a bisa cu e mes a bini for di Dakota. Mas cu 25 aña pasa nan tabatin negoshi na Tarabana. Cheng a bira nostalgico ya cu e ta corda tempo cu el a bay scol. “Unda nos por yuda, nos ta yuda,” el a bisa.

Di su banda den nomber di SKOA, Anuesca Baly a gradici Sr. Cheng pa e bunita gesto cu nan a haci cu Fatima College. El a bisa cu no solamente SKOA ta gradici pa e gesto aki, sino cu Sr. Cheng mescos cu otro comerciantenan ta yuda SKOA. Nan ta sigui stimula e comerciantenan pa sigui inverti den scolnan. “Pasobra e scolnan ta e futuro, caminda e muchanan ta, y caminda e muchanan por siña mas miho,” el a bisa. El a menciona cu semper Fatima College tabata keha di basta calor, specialmente den temporada di september.

Cabesante di Fatima College, Franklin Richardson a declara cu e proyecto di airco aki tabata uno cu nan tabata anhela pa hopi tempo. Un aña y mey nan a lanta un comision pa bira realidad e proyecto aki. El a gradici e miembronan di e comision aki pa nan esfuerso y dedicacion. Pero tambe na tur e team di Fatima College cu a yuda cu nan actividadnan pa nan por haya fondo.