Alto Comisario interino dI Polis, Vanessa Tjon-Kock a informa cu for di 31 di december te cu diaranson ultimo, un total di 21 persona a keda deteni pa violacion di e medida di toque de queda.

A pesar cu tin cooperacion di comunidad, ya cu riba caya despues di cierto oranan di madruga, nan ta bira bastante bashi. Pero toch tin hendenan cu a keda deteni pa e medida aki vigente te dia 31 di januari awor, locual cada un di nan mester paga un boet di mil florin.

Tin diferente control cu ta tumando luga, no solamente di polis, pa loke ta trata di aglomeracion den stacionamento publico. Pero tambe tin diferente control di trafico rond di nos isla. El a declara cu constantemente polis ta moviendo riba caya, y cu diferente instruccion pa loke ta trata e medidanan.

‘Faya Bo Haya’

Mientras cu riba e maneho cu nan a bin cune di “Faya Bo Haya,” el a trece un aclaracion. E ta haya cu tin hendenan cu ta compara e medida aki aplica durante periodo di Carnaval cu e situacion actual debi na e pandemia.

El a indica cu e medida aki, ademas di loke e ta nifica den temporada di Carnaval, e tin otro sorto di medidanan pa refors’e y cu nan ta cana pareu cu e “Faya Bo Haya” original.

El a bisa cu no por compara e medida aki cu Carnaval, ya cu durante Carnaval bo tin e libertad pa bo ta riba caya y luganan publico riba cierto orario. Mientras cu aworaki como ciudadano bo ta mara na cierto orario cu bo no mag ta riba caya debi na toque de queda. Pero tampoco bo no mag di ta den cierto luganan publico of stacionamento debi na e pandemia.

Si por ehempel bo no por ta den un stacionamento publico, unabes cu polis ta yega, nan ta core bo for di e stacionamento. Ya cu na e momento ey e tin autoridad pa haci’e. Kiermen bo no a yega na e parti di por a comete otro delito pa bo por haya bo confronta cu e medida di “Faya Bo Haya.” Mientras cu si normalmente bo tabata den dje y bo ta comete otro delitonan penal, bo ta haya bo den un situacion di “Faya Bo Haya.”

El a bisa cu nan mester splica internamente den cuerpo di polis e distincion aki. Ya cu nan ta papiando di dos lista di boet, y tambe di otro tipo di delitonan.

 

Cualkier boet cu nan ta duna e ta bay via Ministerio Publico (OM). Pero loke habitualmente nan a haci durante e dianan di fiesta y ainda nan ta hacie, ta cu tur fiesta of actividad organisa y divulga via rednan social nan ta bay controla. Tambe tur tip cu a drenta cerca polis di ciudadanonan preocupa, nan ta acerca e organisado y adverti riba cualkier consecuencia. Asina nan ta wordo poni na haltura for di tempran cu nan actividad no por tuma luga, asina Alto Comisario interino a informa.

Nan ta splica e organisadonan di kico ta e medidanan y kico ta e consecuencianan si e actividad ta wordo realisa caminda, e por hay’e cu un sancion. Si e persona of organisado no ta worry cu medida of regla y nan ta organisa nan actividad di otro forma, manera e fenomeno di fiesta clandestino, lo tin consecuencia p’e.

Prome cu un persona ta organisa algo, ta consehabel pa papia prome cu un fiscal, y tambe pa e wak e medidanan cu tin. Pero tambe e sancion cu tin si bo ta bay contra nan. E boet cu tin cu paga si polis ta detene e persona. Esaki den cuadro di evita cu e virus di Covid ta sigui plama y ocasiona mas contagio.

El a bisa cu tur loke tin di haci cu medida y sancion, nan a yega di papi’e deliberadamente den cooperacion cu OM. Kiermen na momento cu polis ta bin cu un sancion, nan ta delibera esaki cu e persona cu a bay contra ley.

Musiconan

El a laga sa cu e hecho cu tin otro sorto di situacion of maneho na Corsou y/of Bonaire, no kiermen cu Aruba tin cu haci’e mescos. E siman aki un grupo mas chikito di Crisis Team a sinta cu e musiconan pa atende cierto critica riba e medidanan cu ta afecta e sector aki.

Nan a yega na un acuerdo caminda departamento di Cultura ta esun cu ta bay coordina e parti di e musiconan. Pa dia 20 di januari, nan lo bin cu un proposicion cu lo wordo evalua pa wak si nan lo introduci otro tipo di maneho of medida pa loke ta trata e musiconan entrante februari awor.

Tjon-Kock a bisa cu nan a trece tur organisacion di musico hunto, teniendo na cuenta e interes cu nan tin pa loke ta trata nan profesion. Nan lo duna espacio pa e musiconan bin cu nan proposicion cu nan lo por duna, a base di nan experiencia na e Crisis Team.

 

LEAVE A REPLY

Please enter your comment!
Please enter your name here