Prome Minister, Evelyn Wever-Croes a informa cu ta wordo contempla un areglo pa e clientenan di FCCA cu a perde nan trabou y cu nan mester paga su hipoteca, mescos cu e sector bancario priva a bin cune.
Tin clientenan di FCCA keda sin trabou debi na e situacion actual di e coronavirus (Covid-19) y cu nan no por paga nan hipoteca. “Ta asina cu FCCA a compromete nan mes pa tene cuenta cu e circunstancia aki,” asina e prome mandatario a bisa contestando pregunta di Bon Dia Aruba.
E prome mandatario a indica cu su colega minister Marisol Lopez-Tromp ta encarga cu e asunto aki, y ya caba e mandatario aki a informa cu FCCA tambe ta bay tene cuenta cu e circunstancia special aki.
El a agrega cu FCCA lo atende cada caso individual. E trato special aki no kiermen cu nan lo bay duna tur hende e posibilidad di no paga nan hipoteca temporalmente.
