Den dianan aki, Argentina ta enfrenta un ley di interupcion di embaraso cu e hende muhe a pidi pa hopi tempo caba.
Alrededor di mey centenar di muhe embarasa cada aña ta muri na e pais aki debi na aborto clandestino, un escalofriante cifra cu Gobierno a stop di publica na 2016. Cerca di 50.000 muhe ta hospitalisa pa cada aña pa complicacionnan cu embaraso.
2.350 mucha muhe menor di 14 aña a bira mama y 87.000 baby a nace di mama menor di 20 aña. Alberto Fernandez, recien eligi presidente, a apoya e aborto den su campaña y lo manda e ley pa Congreso. E lensonan berde, cu Argentina a popularisa pa exigi un aborto liber y sigur, ta hayando voz den e poder.
Mexico a convoca pa dia 9 di maart un welga di hende muhe, cu algun miembro destaca di e poder a apoya despues di varios eror cu a tuma luga den ultimo simannan cu a causa algun disgusto. E declaracionnan di e presidente Andres Manuel Lopez Obrador riba feminismo a haya efecto como si un palo a dal un cas di maribomba.
Den e pais aki, un promedio di 10 hende muhe ta wordo asesina pa dia y e machismo ta presente na varios ambito di bida, cant’i caminda. E medidanan cu ta exigi no a yega ainda, pero e yamada furioso di e tropa biña dilanti di Palacio di Gobierno a cambia e discurso y e diligencia policial pa via di e varios feminicidio cu a sucede, cu na otro ocasion tabata trata como un mal inevitabel.
Latino America tin problemanan parecido: cifranan halto di feminicidio, impunidad hudicial, violencia di genero extendi, secuestro y desaparicionnan di hende muhe y mucha muhe, morto pa aborto clandestino, acceso dificil pa salud obstetra y un pobresa cu, como na henter mundo, ta maximo cerca poblacion femenino. Cu e panorama aki, e delicado machismo contra esun cu e otronan ta lucha na otro zona di mundo no ta prioridad akinan. Akinan e machismo ta mata den cantidad grandi y pa combati esey, e muhenan Latinoamericano ta halsando nan voz den dianan aki. No den tur e pais tin igualdad, pero si ta parce cu e dia 8 di maart lo tin un sabor Latino. Asina e tropa biña ta enfrenta e Dia Internacional di Hende Muhe.
