(AFP)—Un festival di musica cu a tuma luga den centro di Hungria lo caba mas trempan cu loke a programa, organisadornan a bisa diadomingo, despues cu un homber Mericano a cay for di haltura y muri, y un muher a muri di un ataca di curason.
E Festival Ozora di un siman, describi como un di e encuentronan di trance psychedelico mas grandi di mundo, ta atrae dies miles di bishitante cada aña. Diasabra, un Mericano di 45 aña a subi riba un di e decoracionnan rondonando e scenario principal y a cay muri, polis a conta medio noticiero local FEOL.
Autoridadnan y organisadornan a bisa cu nan ta kere e homber a tuma su mesun bida intencionalmente. Mas trempan e dia ey, un muher Hungaro di 39 aña a sufri un emergencia medico “probablemente debi na e calor intenso,” y intentonan pa resucit’e no tabata exitoso, segun FEOL. “Mirando e incidentenan tragico aki, tur programa musical lo caba mey anochi awe, incluyendo esnan na e scenario Pumpui,” organisadornan a bisa riba Facebook, ofreciendo nan condolencia na famia di e victimanan.
Diadomingo tabata e ultimo dia completo di e festival, pero presentacionnan musical riba e scenario Pumpui tabata programa anteriormente pa dura te diadomingo mainta trempan. Hungria ta bao su alerta di calor mas halto desde diahuebs, unda temperatura maximo a yega 40C durante e weekend ki.
Potret ilustrativo.
