(NLTimes) – Un prohibicion durante oranan di dia riba uso di fat bike den centro comercial di Enschede ta parce cu ta reduci situacionnan cu tabata haci peaton, cumprador y otro ciclista sinti nan mes insigur, segun NOS a reporta. E mesun efecto tambe ta ser observa na Vondelpark na Amsterdam, unda un prohibicion similar tambe ta na vigor.

Enschede tabata e prome ciudad cu a introduci e restriccion despues di kehonan ripiti di comerciante y bishitantenan tocante chauffeurnan di fat bike cu tabata core hopi lihe of haci acrobacianan den centro di ciudad, creando situacionnan insigur pa otro usuario di caminda. Funcionarionan encarga cu control a entrega 33 advertencia y a impone nuebe boet te awor.

“Mi por bisa cu e prohibicion di berdad ta funciona,” concehal di Enschede, Marc Teutelink, a declara na NOS. “Nos ta mira cu tin hopi menos situacion insigur, y nos ta tende tambe e mesun comentario di comerciante y di hende cu ta haci nan compras.”

Asociacion di comerciante Winkelhart tambe a confirma cu e situacion a mehora. “Pa bishitantenan ta hopi mas trankil. Hende ta yama atencion di otro. E forma di control social ey nos, como empresarionan, ta aprecia,” presidenta Nicole Workel-ten Bos a declara.

Amsterdam a introduci e prohibicion den Vondelpark un luna despues y tambe a ricibi reaccionnan positivo di ciclista y bishitante di e parke. Funcionarionan di control a impone 94 boet te cu comienso di juli. E ciudad ta haciendo investigacion adicional tocante e efecto di e medida y tin planea publica e resultadonan den herfst.

Tur dos ciudad a introduci e regulacionnan aki mediante nan Ordenansa General Local, permitiendo cu cada municipio ta impone un prohibicion pa localidadnan specifico. Autoridadnan a defini e vehiculonan restringi manera bicicleta electrico cu tairanan di 7 centimeter of mas hancho, un criterio cu tin como meta inclui fat bike sin afecta otro bicicleta electrico.

Gobiernonan a busca durante hopi tempo un manera pa regula fat bike sin inclui bicicleta electrico comun. Awor e validez legal di e definicion basa riba hanchura di tairanan ta den consideracion di un corte. Un importador di fat bike a presenta un demanda civil contra e prohibicion na Enschede, y personanan familiarisa cu e caso ta describi esey manera un caso di prueba. E audiencia principal ta programa pa final di januari.

Diferente otro municipio tambe ta considera introduci prohibicion similar, pero nan ta spera e resultado di e experimentonan na Enschede y Amsterdam of ta sigui cu atencion e desaroyonan di e proceso legal.

Gobierno nacional ta plan pa haci uzo di helm obligatorio na 2027 pa conductor menor di 18 aña cu ta uza fat bike y bicicleta electrico. Ta spera cu e propuesta lo ser presenta na Tweede Kamer den herfst di e aña aki.