Fundacion pa Hende Muhe den Dificultad (FHMD) ta conta Bon Dia cu pronto nan lo sinta cu diferente organisacionnan pa un charla riba varios punto relaciona cu abuso domestico. E meta di esaki ta pa conscientisa riba entre otro e parti di e rol cu un persona publico tin ora cu haya su mes den tipo di situacionnan fastioso rond abuso domestico.

“E ta necesario”, presidente di FHMD Suzy Kock ta bisa Bon Dia. E encuentro aki lo ta mas pa pone hopi atencion riba e responsabilidad di cada un di nos den comunidad. Mas ainda ora cu bo ta un personalidad conoci den nos comunidad, bo tin no solamente e luho di ta un celebridad den forma di bisa, pero tambe bo tin un responsabilidad cu ta bin cu esaki. “Pasobra tur hende ta wak y ta pendiente di tur loke bo ta haci. Of tambe locual cu bo ta keda sin haci.”

Encuentro cu diferente organisacionnan
FHMD pues lo haci un yamada na diferente organisacionnan y personanan den nos comunidad cu tin e plataforma eynan, cu ta conoci, pa wak den ki forma nan tur hunto por yega na un acuerdo riba con lo bay influencia comunidad.

Pa realisa e echo cu violencia no ta aceptabel den ningun parti di nos comunidad, y cu nos como parti di dje no ta dispuesto pa acepta esaki tampoco, pues mester wak kico cada un por contribui na esey segun sra. Kock. “Mi ta kere ta tempo pa nos no solamente pensa cu esaki ta un problema cu nos fundacion so tin cu atende cu esaki. Pero e ta un problema di nos tur, anto e ora esey ta locual cu nos tin pa haci den luna di maart venidero”, sra. Kock ta splica. Nan lo bay acerca diferente organisacionnan y esunnan cu nan no acercaainda, nan ta haci un apelacion pa nan bati na nan porta y ‘ranca nan horea’ pa tambe contribui. “E ta hopi importante y bo no mester ta un cantante, actor, politico, of docente, violencia domestico ta toca nos tur.”

Charla y contribucion
E encuentro lo ta mas manera un charla y tambe con nan ta wak cada contribucion di cada un partner lo mester ta. Por ehempel Stichting Musica lo ta uno cu sigur lo wordo acerca pa bin e charla akinan segun sra. Kock. Pasobra nan tin mayoria di e bandanan mas conoci na Aruba, nan tin esunnan cu e hobennan ta realmente idolisa.

“Pues si haya Stichting Musica acepta e reto eynan di e influencia cu nan ta hunga den nos sociedad. E rol importante cu nan ta hunga den formacion di nos muchanan/hobennan. Mi ta kere esey ta posibel pasobra nan a mustra den varios ocasion cu nan ta dispuesto pa acepta varios reto. Y sinta na mesa ta algo sano y mi ta kere nan tambe lo tin hala di bon ideanan pa algo asina”, sra. Kock ta splica.

Trabaonan boluntario
A pesar di e bon trabao cu entre otro CEDE Aruba ta haciendo pa stimula pueblo di Aruba pa compromete nan mes mas pa haci trabaonan boluntario, ainda comunidad di Aruba parce cu no ta den e trend eynan, segun FHMD. Esey no ta kita afo cu tin varios hende cu si ta haci e trabaonan boluntario caba, pero bo ta mira hopi biaha cu ta mesun hendenan cu ta haci e na diferente otro organisacionnan.

Pues e ta bira practicamente imposibel pa bo por parti bo mes den un cantidad di pida y haci bo trabao boluntario bon segun sra. Kock. “E yamada ta bay na esunnan cu tin e tempo disponibel. Pasobra e no ta un trabao facil pa haci tampoco depende na kico e proyecto ta encera. Tambe esunnan cu ta mas hoben por haci trabao boluntario pasobra awendia esey ta algo cu bo por pone adicionalmente riba bo CV.”

Bo por bay riba www.cedearuba.org por ehempel si bo kier sa mas di esaki, y check e trabaonan boluntario cu tin. FHMD tambe lo ta poniendo ey riba e tipo di boluntarionan cu nan tin mester pa diferente proyectonan cu nan ta bay ta eherciendo durante e aña aki.