(AP) – FIA a bisa ayera cu su oficial di cumplimento a ricibi dos keho “detayando potencial acusacion involucrando cierto miembro di su cuerpo gobernante” den un aparente referencia na kehonan di whistleblower contra e presidente di cuerpo gobernante di Formula Uno.
BBC a reporta e siman aki cu presidente di FIA, Mohammed Ben Sulayem supuestamente a interveni pa reverti un castigo imponi riba Fernando Alonso na e Grand Prix Saudi Arabia aña pasa. Un di dos reportahe di BBC ta bisa cu e mesun whistleblower tambe ta bisa cu Ben Sulayem a bisa oficialnan pa no certifica e circuito di Las Vegas pa su careda di alto perfil november ultimo.
“E departamento di cumplimento ta evaluando e preocupacionnan aki, manera ta practica comun den e asuntonan aki, pa sigura cu ta sigui e proceso debido meticulosamente,” FIA a bisa.
FIA no a confirma ningun detaye tocante e acusacionnan ni si Ben Sulayem ta e persona cu nan ta menciona. Den un declaracion adicional pa AP, un vocero di FIA a bisa: “Ta lamentable y un fuente di gran preocupacion cu e asunto a keda revela na medionan di comunicacion sin ningun autorisacion previo y cu cierto elemento di e rapport a keda reporta incorectamente.”
E reportahenan di BBC ta yega despues di un luna dramatico den cual Red Bull a investiga team principal Christian Horner pa acusacionnan di mal conducta involucrando un empleado di e team. E keho a keda rechassa algun dia prome cu apertura di temporada na Bahrain, un careda cu Max Verstappen di Red Bull a gana.
Hasta despues cu Horner a keda declara inocente pa e compania mama, un cantidad di supuesto evidencia den su contra a leak na mas di 100 miembro di industria durante practica na Bahrain. Horner a rechasa tur acusacion y su esposa, Geri Halliwell tabata para cune riba e dia di e prome careda.
Despues di e careda, tata di Verstappen a bisa The Daily Mail cu e team ta bay explota si no retira Horner di su posicion.
Awo, atencion a bay for di Horner pa acusacionnan contra Ben Sulayem, kende a ricibi scrutinio pisa durante su dos temporada como presidente di FIA.
Ta kere cu e whistleblower ta un ex-empleado di FIA kende awo ta traha pa Formula One Management, un persona cu conocemento directo di e kehonan a bisa AP den condicion anonimo.
E acusacionnan contra Ben Sulayem ta parti di loke ta parce di ta un lucha marga pa poder entre e cuerpo gobernante y F1 mes. Ben Sulayem a keda eligi presidente di FIA pa su miembresia na 2021 apenas algun dia despues cu e final controversial di temporada a costa Lewis Hamilton su di ocho titulo pa kibra record y a duna Verstappen su prome victoria den campeonato mundial.
Ben Sulayem a bira un obhetivo desde su eleccion. El a keda acusa pa Liberty Media di dañinamente subestima balor comercial di F1; el a sostene publicamente Michael Andretti y General Motors den nan intento pa expande e grid di 10 team a pesar di rechaso di F1 pa permiti entrada na e Mericanonan; y aparentemente el a blokea un acuerdo entre e teamnan y Liberty pa duplica e cantidad di weekend cu sprint pa 2023.
Mas recientemente, Ben Sulayem a causa rabia den hefe di Mercedes, Toto Wolff y su esposa Susie, kende ta dirigi e F1 Academy completamente femenino, pa cuestiona si tin conflicto di interes den nan respectivo trabao. FIA a lansa un investigacion di cumplimento riba e pareha Wolff, pero a stop esaki dos dia despues.
FIA ta insisti cu mester ricibi un keho prome cu por investiga cualkier acto inapropia, y nunca a clarifica kico a duna impulso na e investigacion riba e pareha. Na mes momento, un falta di keho formal entrega na e FIA contra Horner a keda cita como e motibo pakico FIA no a lansa su propio investigacion.
Den e acusacionnan mas recien, e whistleblower supuestamente a bisa BBC cu Ben Sulayem a yama Sheikh Abdullah bin Hamad bin Isa Al Khalifa – vice-presidente pa sport pa region Medio Oriente y Nort Africa di FIA – pa laga cla cu e ta pensa cu un castigo di 10 seconde contra Alonso ultimo temporada mester keda anula pa trabao haci riba su auto mientras e tabata sirbi un castigo anterior di cinco seconde.
E castigo a baha Alonso for di tres na di cuatro lugar. E castigo a keda reverti, y Alonso a saca George Russell di Mercedes for di podium.
Herfst ultimo, Ben Sulayem supuestamente a bisa stewards di careda pa haya un manera pa no declara e circuito di Las Vegas safe pa un careda. E pista temporal riba caya no a keda completa na tempo pa inspeccion den e bentana rekeri pa FIA prome cu un evento. E inspeccion a tuma lugar mainta trempan prome cu e prome practica, y Carlos Sainz Jr. a core riba un tapa los cu a destrui su Ferrari y a caba cu e sesion despues di apenas nuebe minuut. Mester a re-inspecciona henter e pista, conduciendo na retrasonan largo y un di dos practica cu a termina pa 4am sin publico presente. Ferrari a bisa luna pasa cu ainda mester yega na un resolucion financiero cu F1 pa e gasto di reparacion di auto di Sainz.
BBC a bisa cu e whistleblower a haya instruccion di su manager “den nomber di presidente di FIA” pa “haya algun preocupacion pa preveni FIA di certifica e circuito prome cu weekend di e careda.” BBC a bisa cu e rapport di cumplimento ta cita e whistleblower bisando cu “e proposito tabata pa haya fayo cu e pista pa asina retene nan licencia.”
E careda debut di Las Vegas Grand Prix tabata e prome promovi pa F1 y Liberty Media, y a gasta alrededor di $500 miyon riba e evento. No a keda revela pakico Ben Sulayem lo tabata kier sink e evento, cual a surpasa tur obstaculo pa produci un di e miho caredanan di temporada 2023.
F1 ta core na Saudi Arabia e weekend aki.
