Tabatin un fiesta cu baile den un beachtent cerca di Utrecht diasabra anochi cu un grupo bastante grandi cu aparentemente no tabata haci caso di reglanan di distanciamento social actualmente vigente. Riba imagen cu dj Jean, un di e artistanan presente, a pone riba Instagram por mira cu un grupo grandi di hende tabata baila cerca di e dj bao di e tent. E tabata parce un fiesta ameno manera tabata custumber promer cu e era di coronavirus a cuminza.
E doño di e tent a keda disgusta y ta bisa cu tabata trata di un momento so. Segun el a conta, awa a cuminza yobe anto e hendenan a drenta den e tent pa sconde.
Riba e Facebookpage e evento a bende cu entusiasmo. “Diasabra 22 di augustus nos ta bay back na un fietsa riba beach y riba terasa. Dj-nan conoci manera Roog y Erick E y dj Jean ta actua pa e 250 personanan presente.” Segun e organisacion e fiesta lo a tene cuenta cu e medidanan di RIVM. Pero riba e imagennan di e conocido dj por mira cu tabata neglisha e reglanan ey. Asina un grupo grandi no tabata mantene e 1,5 meter di distancia obligatorio.
E doño di Beachclub Klein Scheveningen, Richard Fick, ta disgusta cu e video. E evento na Lopikerkapel na e rio Lek segun e si tabata cumpli cu e reglanan. “E tabata djis un momento, pasobra e hendenan a bin sconde pa awacero.” El a declara tambe cu el a bisa e dj cu e video no tabata bon; riba evideo no por mira cu awa ta yobiendo. Loke si ta mira cu solo ta briya y cu e masa presente ta baila cu placer.
