Drs. J.R. Rajnher, director di ImSan a duna di conoce cu nan ta yegando den ultimo lunanan di renobacion y ampliacion di Instituto Medico di San Nicolas, cu ta un proyecto ‘sumamente complica’.

Tocante esaki, el a splica cu nan tabatin un centro medico cu ta funcionando y nan tin cu sigui brinda e mesun servicio. Sinembargo, a pesar di esey nan tin cu haci construccion, renobacion, trece tur sorto di ekipo nobo y haci henter revision di e sistema di red di comunicacion y internet.

Hopi hende tabata envolvi den proyecto aki. Asina mes Rajnher a bisa cu hopi dunado di servicio medico, specialistanan medico y enfermero a join nan pa sigui duna e miho servicio y cuido medico posibel na Aruba. Esaki den cooperacion cu Baptist Health South Florida, cu ta yuda nan pa yega na un calidad di servicio di un Join Commission Internacional (JCI), cual ta un marca mayor pa demostra cu nan ta trahando na un nivel di calidad y siguridad di servicio pa e pashent.

Asina mes, el a confirma cu nan a crece den ultimo añanan y nan ta sigui crece. E proyecto mester ta completo aproximadamente pa fin di maart, ora cu nan lo haya e entrega di e ultimo parti no clinico cu no ta pa pashent. Imsan ta cla cu e parti di renobacion y expansion caba.

Rajnher a informa cu nan a logra finalisa e departamento di sterilisacion, unda tur instrument ta wordo sterilisa cu tecnologia avansa pa duna sosten completo pa e salanan di operacion y pa e resto di ImSan, unda cualkier instrument medico cu ta wordo usa mester wordo sterilisa. Ademas di esey nan tin un over capacity cu nan por haci tambe pa e resto di e isla, si ta necesario.

Di mesun manera, el a declara cu a termina cu construccion di salanan pre-operativo y post- operativo, unda pashent ta yega prome cu operacion y despues di operacion, cu tambe tin tecnologia nobo cu full monitor.

Ademas Rajnher a comenta cu tin un sala specialisa pa wowo cu tambe ta conta cu oftalmologonan specialisa. Ya nan a cuminsa caba cu varios pashent cu a opera di nan wowo, como por ehempel catarata. Tambe ayera a tuma luga e prome operacion di retina, mientras cu antes tur pashent cu mester di operacion di e tipo aki tabata bay hacie den exterior, sea na Corsou of Colombia.

Departamento di Polyclinic Outpatient di wowo a keda totalmente renoba cu tur aparato laser di ultimo tecnologia y tur specialista di wowo ta traha hunto na Aruba. Manera Dr. Jacobs, kende no ta na servicio di ImSan, pero e ta haci su operacionnan den e centro aki tambe.

Tambe Rajnher a sigura cu otro renobacion a tuma luga na departamento di Radiologia, na unda nan ta saca potret, ecografia y CT scan, cu antes nan no tabatin e opcion pa haci esaki.

Tocante e mashin nobo pa radioterapia unico den Caribe y Latino America, Rajnher a expresa cu den un par di siman nan mester ta cla cu tur e test cu a wordo haci pa por ta operacional. E mashin ta traha, pero mester ta calibra pa e por funciona cu 100%.

Pa finalisa, di loke ta trata e trahadonan di e centro di cuido, Rajnher a resalta cu nan a haci un ampliacion di cantidad di trahado y manera cu nan lo haci mas produccion, nan lo mester di busca mas empleado tambe. Loke nan tin awor ta suficiente pa cuminsa e prome lunanan y nan lo bay wak den cua ramo nan mester mas specialista.

 

LEAVE A REPLY

Please enter your comment!
Please enter your name here