Departamento di Asunto Social (DAS) a duna di conoce ayera mainta cu durante e fin di siman aki, cuminsando for di diabierna 8 di mei, nan lo bay paga e bijstand di luna di mei.
Asina a splica PR di Departamento di Asunto Social, Jesseline Soto Garcia-Kelly na unda el a manifesta cu e fin di siman aki nan lo cuminsa paga bijstand di luna di mei pa 1.934 persona di tur districto. Tambe cu nan lo cuminsa haci algun cambio pa tres localidad di pago cu ta postkantoor San Nicolas, postkantoor Oranjestad y MFA Savaneta.
Asina mes, el a comenta cu e tres localidad aki ta esunnan di mas grandi pa pago y nan tin e mesun cambio cu na luna di april.
Diabierna 8 di mei, cuminsando 8or di mainta te cu 12or di merdia, postkantoor San Nicolas y postkantoor Oranjestad ta bay paga bijstand desde fam A te cu K; diasabra 9 di mei postkantoor San Nicolas, postkantoor Oranjestad na mesun orario lo bay paga bijstand di fam L te cu Z.
Di e tres localidad cu tin cambio ta MFA Savaneta cu diasabra 9 di mei desde 8or di mainta te cu 12or di merdia bijstand pa fam A te cu K y parti di merdia desde 1or te cu 5orlo paga fam L te cu Z.
Pa loke ta trata MFA Santa Cruz, Paradera y Noord no tin ningun cambio. Tur hende cu ta cobra na e tres localidadnan aki ta cobra normal e dia diasabra desde 8or te cu 12 di merdia.
Soto Garcia-Kelly a informa cu nan ta continua cu e mesun regla di luna di mei, entre nan cu no ta permiti pa trece muchanan den establecimento di pago y si e persona cu mester cobra bijstand ta malo y no por bay cobra, e por autorisa otro persona di mas di 18 aña pa bay cobra p’e. E persona autorisa mester acudi den dianan aki na sede di DAS cu e ID di e dos persona mas un carta di autorisacion.
Den caso cu e persona ta interna den hospital, e persona mester tuma contacto cu un trahado social di hospital pa esey wordo regla mas pronto cu ta posibel.
Pa finalisa, tur hende di edad mas avansa lo haya prioridad pa drenta den establecimento como MFA y postkantoor, pa via cu nan ta aplica nan mesun reglanan pa loke ta trata distanciamento social y nan ta permiti un cantidad limita di personanan pa drenta. E resto tin cu para den e rij cu e distancia rekeri.
Di loke ta trata e pago di bijstand di luna di april, el a señala cu esey a cana hopi bon. Hendenan a adapta pa e cambio y nan a cumpli cune, un cantidad chikito so pa un motibo of otro no a haya e cambio na or,a pero e gran mayoria di clientenan a cobra manera cu DAS a solicita.
