Finalmente lo basha ex Bushiri Hotel cu asbest kibra abou

Pa hopi aña e ruina di ex Bushiri Hotel ta forma un problema di molester y pa salud como un mal bista den un area central di Aruba. Despues di varios promesa gobierno a anuncia ayera cu awor sigur lo basha e edificio abou. E limpiesa lo tuma mas o menos 2 luna di trabou y lo costa 800 mil florin.

Van Den Broek Construction, Labor & Cleaning ta e compania cu a gana e destaho pa haci trabou. E contratista ta laga sa ayera cu desde 2012 cu scol Abraham de Veer, nan tin experiencia cu eliminacion di asbest. E contratista ta bisa: “E materialnan cu nos ta uza pa trata cu asbest ta bin for di Hulanda, cual tambe ta aproba.” Na Abraham de Veer nan a elimina casi 2000 metro cuadra, anto na Bushiri Hotel nan mester elimina casi 6.000 metro cuadra.

No a bira mucho cla ayera ki material y di unda e aprobacion a bin, pues Bon Dia Aruba lo sigui riba e punto aki. Un otro punto cu a keda sin mucho splicacion ta e parti di siguridad. Nan a calcula cu e trabou ta tuma mas o menos 55 dia. Ki y cuanto dia e compania lo tuma pa kita e asbest ta keda un pregunta ainda mescos si e ora nan ta cera parti di LG Smith Boulevard y na banda direccion di Divi Tamarijn pa preveni riesgonan pa salud. Manera conoci asbest ta causa cancer y momento cu ta kibra e asbest, bo por core riesgo di inhala e fiber.

Ya caba e asbest cu tambe ta na banda di e murayanan, ta kibra y ta forma pa añanan un riesgo pa esun den e area. Manera conoci tin un beach na banda cu local y tambe turista ta uza diariamente. Aunke director di departamento di DOW Marlon Croes a bisa ayera cu nan ta den beneficio pa deshaci e asbest como cu ‘pabou di nos lama bo tin’. Sinembargo nan ta bay traha un plan di siguridad y salud, e director ta sigura. Hunto cu departamentonan di Salud, DOW, DTI y contratista. Kico e rol di Volksgezondheid lo bay encera no ta sigur pasobra nan nunca a yega na un maneho riba esaki.

E director tambe ta referi na e protocol di departamento di DTI pa deshaci asbest (cual ta un decreto ministerial) segun e reglanan stipula. Durante e proyecto nan ta bay traha cu nan, sr. Croes ta sigura. Y manera stipula tambe Parkietenbos ta e unico dump unda por hiba asbest. “Esey nos lo wak con nos ta haci cu e protocol”, segun director Croes.