Flex-Team cu 73 control y 5 detencion den un siman

Flex-Team di Cuerpo Policial Aruba siman pasa a tene control rond di Aruba, unda den e periodo di dia 13 pa dia 19 di juni tabatin un saldo di 5 detencion. E detencionnan tabata en conexion cu e ley pa cu droga (2), buracheria den luganan publico (2) y maltrato cu arma (1).

E miembronan di e team a patruya den diferente bario y areanan unda tradicionalmente por tin aglomeracion di hende y ta conoci como luganan unda cu droga ta wordo bendi; den bisindario di y den negoshinan cu ta keda habri te den oranan di marduga, etc. Entre otro den e bisindario di Manuelito’s, Circle K y Hotel Baccarat nan a actua cu man duro contra hendenan cu ta aglomera. Na luganan manera Lekker y De Old Molen a controla y percura pa despues cu e luganan a cera tur hende tuma direccion pa nan cas mas rapido posibel.

Flex-Team a atende tambe cu tur e gruponan cu den oranan di anochi ta topa na Eagle Beach y ta toca muziek duro y bebe bebidanan alcoholico. Polis controla personanan di cual tin sospecho di cualkier infraccion. Riba diahuebs, en conexion cu Carubbean Festival, a patruya y controla na San Nicolas tambe.

Pa loke ta e detencionnan pa bendemento di droga, tur dos a tuma luga riba dia 16 di juni. E prome tabata un hende muhe di inicial P.A.F.L. den bisindario di Golden Wok. E sospechoso tabatin cun’e un saco cu 36 piedra chikito di cocaina. E di dos detencion a tuma luga na Dakota; e tabatin un sigaria di marihuana, dos saco chikito cu yerba cu ta parce marihuana, saco chikito cu puiro blanco, y algun piedra blanco cu ta parce cocaina.

Flex-Team a detene tambe dos hende homber na RIU Hotel despues cu un security a haya nan den baño ta huma marihuana. Nan a wordo deteni acusa di buracheria den luganan publico, como cu nan tabata tambe bao di influencia di alcohol y tabata causa molester. Na momento di e nan aresto nan a ofrece e agentenan policial 100 dollar pa laga nan den libertad, locual a resulta den un keho extra, esta di “soborno”, contra nan.

E otro aresto a tuma luga riba diadomingo, unda cu un persona a keda ataca cu un arma blanco na Señor Frog’s. E victima a ricibi un corta y un hinca. Uzando datonan di e auto di e sospechoso polisnan a logra detene den Apelsinastraat pa maltrato cu arma. A haya e sospechoso aki cu cantidad chikito di marihuana y cocaina, dos sker y un grinder.

 Flex-Team a efectua un total di 73 control durante di e siman menciona.