Warda di Polis Oranjestad.JPG

Cuerpo Policial ta sigui cu accionnan special y ta aumenta nan presencia cu mas patruya den fin di siman den diferente area rond Aruba. Entre diabierna, diasabra y diadomingo e team di “Rapid Response Team” a patruya durante un total di 24 ora den e districto y barionan di San Nicolas, Santa Cruz, Sabana Basora Noord, Oranjestad y den e area di hotel.

Entre otro diabierna e team a atende cu menasa cu arma di candela na Sabana Basora, pa cual Polis a ricibi un yamada cu un grupo di mucha homber di e gang di Santa Cruz a menasa un habitante di un cas na Sabana Basora Noord. Polis a controla den e bario y den Santa Cruz, pero no a topa cu e auto di e sospechosonan.

Mas laat riba diabierna Polis a ricibi yamada cu a tende dos tiro banda di Watergate na Companashi. E dos tironan supuestamente a bin for di un auto y Polis a controla e bisindario pa e auto y e hombernan cu tabata den dje, pero no a topa cu e auto. E mesun auto a wordo mira despues den area di Sandra’s Garden na Oranjestad, pero e chauffeur tabata un hende muhe. Patruya di Polis a keda patruya den e area como un medida preventivo.

Riba diadomingo, despues cu Polis a haya un melding pa bay den direccion di Circle K relaciona cu un ladronicia nan a topa den e vecindario cu un auto ta core sin luz dilanti. Durante di control di e auto a haya tres hende homber cu no tabatin nan documentonan cu nan y a bay over na detene nan y transporta nan pa warda di Playa.

Miembronan di e team di RRT a wordo pidi pa brinda apoyo na coleganan den districto 3 cu un control den Centro di San Nicolas. Esaki tambe a tuma luga diadomingo. Nan a controla 12 persona den cayanan di San Nicolas y Village y no tabatin ningun iregularidad.

LEAVE A REPLY

Please enter your comment!
Please enter your name here