For di Merca: Consultant Mericano positivo pa coronavirus su casa a bati bel na Aruba

Hefe di departamento di Malesa Contagioso (DBZ), Sharline Koolman a referi riba e caso specifico di e consultant Mericano cu a sali positivo pa coronavirus.

El a bisa cu dia 12 di maart, nos autoridad competente a wordo informa pa e consultant su señora cu ta na Merca riba e sospecho aki, y e ta esun cu a bati e bel. Ya cu den e grupo cu e consultant a biaha recientemente na Egipto cu nan, prome cu el a bin Aruba, tabatin un persona cu a getest positivo pa coronavirus.

“E señora aki a cumpli cu su deber di informa Aruba,” Koolman a bisa.

A base di e informacion ricibi for di Merca, nan a actua di biaha cerca e meneer Mericano pa wak si e tabata mustra algun sintoma di e virus. Unabes cu nan a cumpli cu esaki nan a dicidi di test e persona aki, y claramente el a wordo poni den isolacion. Unabes cu nan a haya e resultado di e test den 24 ora, cu a resulta uno positivo, nan a comunica esaki na nos mandatarionan cu a informa oficialmente nos comunidad diabierna ultimo.

Igualmente Koolman a bisa cu ora e consultant Mericano a bin Aruba, tabata su 10 dia, ya cu e prome dia cu el a sinti malo tabata 28 di februari. El a bisa cu den principio entre 2 pa 7 dia ta e tempo cu e virus ta mas halto den bo curpa, caminda e por plama mas lihe. Kiermen e consultant Mericano despues di 11 dia, el a presenta na WEB. Esaki ta haci cu e posibilidad di contagia mas hende ta bira menos.

E meneer aki ta bon di salud y e ta wardando ainda, ya cu e unico cos cu e tabatin ta un tos seco. Unabes cu esaki kita, y e no tin niun sintoma mas, nan ta warda 24 ora -manera reglanan internacional ta stipula- y despues e por bandona nos pais.

Segun informacion cu DVZ ta maneha relaciona cu Coronavirus ta mustra cu te cu awor alrededor di 2 pa 3 hende normalmente ta wordo contagia dor di un persona cu ta cargando e virus.

Cu esaki e kier trece mas trankilidad den sentido cu si eventualmente bo tabatin contacto directo cu un hende cu tin e virus aki, esey no kiermen cu bo ta contagia di biaha.

Te aworaki un 90% di e personanan cu tabatin contacto cu un persona cu tin e sintoma, nan sintomanan ta hopi leve. Kiermen un persona por tin’e, pero debi cu su sistema inmunologico ta hopi bon, y cu no ta den categoria di riesgo, e no ta bira hopi malo.