Un homber di London a bira e segundo persona den mundo cu a cura di HIV, dokter a bisa.
Adam Castillejo ta liber di e virus mas di 30 luna despues di stop terapia anti-retroviral. E no a cura cu e remedi pa HIV, sino cu un tratamento di stem-cell cu el a ricibi pa un cancer cu e tambe tabatin, segun journal Lancet HIV ta reporta. E dunadonan di e stem-cellnan aki tin un gen poco comun cu ta duna nan, y awo Castillejo, proteccion contra HIV.
Castillejo, awo di 40 aña di edad kende a dicidi pa revela su identidad, no tin infeccion activo detectable cu HIV den su sanger, semen of tehido, segun su dokternan. Awo ta un aña despues cu nan a anuncia cu e ta liber di e virus, y ainda e ta liber di HIV.
Hefe di investigacion, prof. Ravindra Kumar Gupta, di Universidad di Cambridge, a bisa BBC News: “Esaki ta representa cura di HIV casi sigur. Nos tin awo dos aña y mey cu remision liber di anti-retroviral. Nos hallazgo ta mustra cu e exito di e transplante di stem-cell como cura pa HIV, prome reporta nuebe aña atras den ‘Pashent Berlin’, por ser replica.”
Pero no lo ta un tratamento pa miyones di persona rond mundo bibando cu HIV. E terapia agresivo aki a ser usa mas tanto pa trata cancer di e pashent, no HIV. Droganan actual pa HIV ta keda hopi efectivo, nificando cu hende cu e virus por biba bidanan largo y saludabel.
Sinembargo, lo por ofrece speransa di haya un cura, den futuro, usando terapia genetico. Test ta sugeri cu 90% di celnan immuun di Castillejo a ser reemplasa pa esunnan di e dunado. Pero ainda e tin resto di e virus den su curpa. Y ta imposibel pa bisa cu certeza absoluto cu su HIV nunca lo bolbe.
