Despues cu hues a tuma decision den sentencia cu director di DIMAS, Kathy Paskel a entama contra minister Glenbert Croes, den cual a dicta cu e decision aki tabata contra ley, fraccionnan MAS y Accion21 ta solicita un reunion publico cu Croes pa debati e ‘consecuencianan’ di e decision aki.

Den un carta dirigi na presidente di Parlamento, Edgard Vrolijk, Fraccionnan MAS y Accion21 ta skirbi:
A base di e carta aki, nos ta desea den nomber di Fraccion MAS y Fraccion Accion 21 pa obtene aclaracion lo mas pronto posibel tocante e consecuencianan di e decision di hues cu respecto e director di DIMAS, Sra. Kathleen Ruiz Paskel. Pa esaki nos ta solicita mediante e presente carta pa invita e minister di Labor, Energia y Integracion, Glenbert F. Croes, na un reunion publico convoca cu e debido diligencia, cu e unico punto di agenda: “E sentencia di 30 di mei 2022, Gaza No. AUA 202200988 cu ta confirma e hechonan ilegal contra Sra. Kathleen Ruiz Paskel, y e consecuencianan di e decisionnan impugna suspendi di e minister di Labor, Energia y Integracion, Sr. Glenbert F. Croes. Bo cooperacion den esaki ta altamente aprecia.”

Riba su pagina di Facebook, Lopez Tromp a comenta: “E uispraak di hues riba e decisionnan di minister Glenbert Croes pa hala e director di DIMAS un banda ta papia pa su mes: E decretonan ministerial ta contra constitucion, contra ley di LIM. Alabes un MB no por reemplasa e LB di e director. Tur minister Glenbert Croes su argumentacionnan pa haci esaki ta faya y den cualkier pais un minister cu haya un uitspraak di hues asina contra dje, lo tene honor na su mes y retira.”

Dunando declaracion na noticiero local 24ora, Lopez Tromp a comenta: “Mi tin cu bisa cu e topico aki, despues di a lesa e vonnis, e ta laga e minister huridicamente na werki.”

Esaki pasobra den opinion di Lopez Tromp, a rechasa tur e argumentonan cu e minister a duna pa hustifica cu el a bin cu un decreto ministerial – “cu segun e ta kere ta mas halto cu un landsbesluit”.
“Den e vonnis nan ta bis’e hopi cla, cu e minister a actua den e caso akinan no solamente contra e landsbesluit di e directora, pero tambe contra Constitucion, y tambe contra e propio landsverordening instellingen ministeries, cu ta regula e funcion di minister, y tur loke ta cay bao di dje”, Lopez Tromp a comenta. “Den e caso akinan tambe ta trece dilanti cu nan ta constata den e vonnis cu e minister kier a djis hala e directora un banda… e kiermen cu e no ta confi’e mas, pa su motibonan” y a pone otro persona riba dje, kende antes tabata bao di dje.

Lopez Tromp a destaca cu fraccion MAS ‘for di basta luna pasa’ a haci pregunta, ‘no solamente na maart ultimo awo cu discusion a surgi ora di hala e directora’, sino di aña pasa december. “Ya caba ora cu minister Glenbert Croes a saca e prome MB caba” cu tabata dudoso, “cu no tabata nada fuerte hinca den otro, nos a haci pregunta riba e MB ‘kinan. Y e respuestanan cu nos a haya tabata comosifuera cu e por haci esaki, y e ta laga e directora eynan. Despues di tempo, nos a wak e directora, el a hal’e un banda.”

 

Manera Bon Dia Aruba a reporta e siman aki, hues a suspende e decision di e mandatario te ora cu e caso wordo trata den su profundidad, aunke gobierno no tin mucho chens di gana esaki [un bodemprocedure] mirando cu e decision tabata uno contra ley.

“Mi ta satisfecho cu e contenido di e veredicto,” Sra. Kathy Paskel ta bisa Bon Dia, agregando cu: “Mi awor por sigui desplega mi trabao diario cu tur e autoridadnan cu ta coresponde na e funcion di director.”

Manera conoci, Minister Glenbert Croes a duna retiro na director di DIMAS, Kathy Paskel pa motibo di desconfiansa, y lo mester a bin cu un stuurgroep cu e meta pa guia y informa trahadonan di DIMAS pa loke ta trata maneho nobo di e ministerio aki. Hues a dicta Dialuna cu e decision di e mandatario tabata contra ley y tuma pa motibo di desconfiansa cual ta viola e structura di herarkia di e sistema di DIMAS. Sra. Paskel awor ta haya tur poder back na DIMAS manera e tabata tin anteriormente prome cu decision tuma pa e mandatario algun luna atras.

Segun veredicto, e decision di minister Croes pa pone Sra. Paskel un banda ta basa riba hecho cu no tin confiansa riba dje mas y Hues ta bisa cu gobierno ta faya den mustra base legal pakico ta tuma e decision aki na prome luga.

Hues a subraya tambe cu a faya den e manera con a trata cu Sra. Paskel por medio di cambia structura, na unda cu solamente pa nomber e lo keda director, pero cu tur otro decision lo mester pasa via un management team. Esaki ta viola regla di herarkia di e funcion conforme ley.