(AP) — Francia a habri 400 investigacion riba rednan cu ta provee pasenan di salud falso pa Covid-19, segun minister di Interior a bisa ayera, mientras hospitalisacionnan relaciona cu e virus ta aumenta criticamente na e pais.
E caso di un muhe cu e virus cu a fayece den un hospital regional di Paris despues di mustra un certificado di vacunacion falso a hala atencion den medionan di comunicacion Frances recientemente. Hefe di Cuido Intensivo di e hospital a bisa cu nan lo a duna e muhe tratamento di anticuerpo inmediato si nan tabata sa cu e no ta vacuna.
Autoridadnan a identifica varios miles di pasenan di salud di Covid-19 falso den uso rond di Francia, minister di Interior, Gerald Darmanin a bisa ayera riba radio RTL. El a bisa cu a habri alrededor di 400 investigacion riba oferta di pasenan falso, incluyendo algun ‘conecta na profesionalnan di salud’.
E no a bisa cuanto hende a aresta te awo, ni a duna detayenan. Gobierno ta reforsando e reglanan riba e pasenan, rekeri pa drenta tur restaurant y un cantidad cresciente di evento y sitio. Pa haya un pase, hende mester mustra prueba di vacunacion completo, test negativo pa e virus menos di 24 ora bieu, of recuperacion recien di Covid-19.
Cu mas infeccionnan nobo confirma den un dia siman pasa cu riba cualkier otro punto di e pandemia, Francia ta acelerando esfuersonan pa booster shot cu speransa cu esey ta suficiente pa reduci presion riba hospital. Mita di Unidadnan di Cuido Intensivo na Francia ta ocupa pa pashent di e virus, algun region un biaha mas retrasando cirugianan no-urgente, y mas di 100 persona cu e virus ta fayece cada dia na e pais.
Gobierno a cera clubnan nocturno y a reforsa medidanan di distancia social, pero ta purbando pa evita un lockdown nobo. Minister di Salud, Olivier Veran, a bisa corant Le Parisien cu mientras ‘e ola epidemico ta violento’, tin señalnan cu ta bahando velocidad. El a bisa cu 90 porciento di esnan mayor di 65 aña a ricibi booster shot te awo.
