Corte Comun ta un instituto cu ta uni e seis islanan di Reino Hulandes den Caribe

E instituto di Corte Comun di Husticia pa e paisnan y islanan Hulandes den Caribe ta algo bunita, pasobra ta e unico cu ta tene tur hunto. Asina actual Vice Presidente di Corte Comun y proximamente, Presidente mr. Mauritsz de Kort a bisa den e di dos parti di e entrevista cu Bon Dia Aruba a tene.

Manera ta conoci, recientemente mr. de Kort, di Aruba, a keda eligi pa asumi e cargo di Corte Comun, un funcion cu el a bisa cu ta mas bien Presidente di un Directiva cu tin otro miembronan cu tambe tin nan trabao pa haci.

“E Corte Comun ta di vital importancia pa unidad di e seis islanan y ademas e ta asina importante den e estado di derecho. Y un manera di aporta den un instituto asina ta drenta den su maneho. Asina poco poco a bin e stap pa mi drenta den directiva di Corte na 2017 y tabata coleganan a puntra mr. de Kort pa aplica pa solicita pa e funcion di Presidente di Corte. Y ta e propio coleganan a vota den mayoria pa nan colega, un huez specialisa den casonan penal, asumi e cargo di Presidente di Corte entrante prome di Januari, 2022.

Ondermijning

A ripara cu den politica tin mas atencion pa casonan di ondermijning, casonan penal unda ta duna mas atencion na actonan cu ta mina estado di derecho. Manera e casonan di corupcion. Esey ta trece cu n;e, cu di parti di Ministerio Publico tin mas persecucion. El a cuminza na St. Maarten, a sigui pa Corsou y awor e tendencia ta na Aruba tambe. E papel di Corte ta si Ministerio Publico dicidi pa persigui cierto caso y ta present’e na Corte, “Corte tin e obligacion di trata nan. Nos tin mester percura, tin e obligacion pa percura cu tin e capacidad pa acapara e casonan y trata nan.”

Importante pa comunidadnan di e paisnan realisa si cu Corte ta tuma un posicion imparcial. Den otro palabra, no por pensa cu Corte ta na banda di un partido, pasobra nunca por scoge partido. Ni esun di Ministerio Publico. “Corte su punto di salida ta cu e ta imparcial, e tin cu cumpli y duna veredicto a base di hecho y di ley. Y den cuadro di ley, no solamente locual ta skirbi pero tambe hurisprudencia y den cuadro di locual tratadonan internacional ta dicta. Rol di Corte den casonan asina ta hopi responsive, ta ora cu Ministerio Publico ta dicidi cu despues di haci un investigacion, y tin suficiente prueba y e ta kere cu e tin un bon chens na Corte, e ta trec’e dilanti. Ministerio Publico por scoge tambe pa yega na un areglo cu e sospechoso, of personanan sospechoso. E ta un intercambio unda na un banda tin un Ministerio Publico ta haci uso di derecho di persecucion y di otro banda, Corte ta bay wak si berdad tin e pruebanan cu Ministerio Publico ta asumi. “Aki na Corsou tabatin un caso masha grandi, caminda un sospechoso hasta a keda declara liber. Esey ta mustra cu Corte mester haci su trabao imparcial, a base di hecho y derecho. Kiermen, e no ta un garantia cu tur hende cu den caso di minamento di derecho y di fraude automaticamente lo haya un condena of castigo.

Tres obhetivo concreto pa awor

Ainda de Kort no a formula su discurso na momento di asumi e cargo, pero locual e sa si kico si ta un prioridad p’e. “Mi kier pone atencion den termino di cinco aña. Un di nan ta algo interno, cu ta un reorganisacion cu ta tumando luga. Tin un proceso di reorganisacion interno tumando luga y mester keda finalisa. Na final mester dicidi con ta implementa e reorganisacion aki.”

E dos tema tin di haber cu ubicacion. “Na Aruba, edificio di Corte a pasa door di un renobacion nobo, den cooperacion cu Bureau Monumentenzorg, bao guia di Sra. Web-Kock. Aruba por lo tanto no ta un problema. Pero na Boneiro ta den proceso pa traha un edificio nobo pa Corte, na Corsou mester renoba e Stadhuis anterior unda nos tabata y na St. Maarten ainda mester caba cu e renobacion despues di horcan Irma, y mester tuma un decision riba presencia mas structural na St. Eustatius y Saba. Pues ubicacion, esta huisvesting lo ta un tema importante pa e proximo periodo.”

E otro tema ta esun di digitalisacion pa mira di ki forma Corte Comun por ta mas accesibel di forma digital.

Orguyo

Pa mr. Amalin Flanegin, ex Fiscal y e Kwartiermaker pa e Camara di Integridad di Aruba, e nombramento di mr. Mauritsz de Kort ta yen’e cu emocion. Un orguyo con e mucha cu a lanta manera famia, mirando cu nan mamanan tabata bon amiga, ta logrando proposito. “Mau ta mas jong cu mi, pero nos a lanta hunto si como hoben. Y e tempo ey nunca ma pensa cu e lo bira Presidente di Corte Comun. Pero despues, ora cu el a cuminza su carera bayendo Hulanda, den contacto cu su mama Alba, mi tabata sa cu e lo yega leu.”

Segun Amalin Flanegin, Mauritsz de Kort semper a keda e mesun hende. Di mucha pa awor. Esta un persona cu ta papia manera e ta. “E no ta bisa cu por ehempel cu estudio ta importante y e no ta para tras di e pensamento ey. E ta bisa locual berdad e ta pensa. E ta un hende, den mi bista, un hende corecto, integro y cu realmente e kier pa cos cana bon. Asina e tabata desde mucha. Y e no ta aparenta di ta un hende honesto, sino cu berdad e ta honesto. E ta un hende cu ta gusta haci joke, pero e ta comprometi. Un shon di hende manera su mama.”

Yiu di tera

Y awor e hoben serio y determina ta bay asumi e responsabilidad pa un institucion di gran balor pa estado di derecho. “E ta inspira un sentimento di orguyo, cu un Arubiano ta asumi un cargo asina. Segun mi ta prome biaha cu tin un Presidente di Corte Comun cu ta naci na Aruba, cu a bay scol na Aruba, a bay Hulanda y a yega asina leu.”

Y como ehempel pa tur, e balor ta mas grandi ainda. Pasobra Mauritsz de Kort ta un ehempel con un estudio tabata na Aruba. Esta di un nivel cu por brinda oportunidad grandi. “Mi ta spera cu e educacion por keda na un nivel cu por sigui produci hende asina. E ta un ehempel y Mauritsz a indica esey tambe, cu educacion ta brinda posibilidad. Y nos tine na Aruba. No mester bira dokter, e por ta otro profesion. Tur hende por yega na un profesion y esey ta cu educacion por hay’e. Y p’esey educacion ta e punto principal. Y manera Mau ta bisa, educacion ta accesibel na nos aki. Y tur hende por cana e caminda ey pa provee pa famia. Y no tur mester bira Huez, of docente. Tin otro profesion cu ta necesario den comunidad. P’esey mes Gobierno mester sigui inverti den educacion.” Pasobra cu educacion, comunidad di Aruba por sigui produci personanan excepcional manera e proximo Presidente di Corte Comun, mr. Mauritsz de Kort.