President di Venezuela, Nicolas Maduro pa medio di un comunicado di prensa den cadena nacional, a ordena pa cera e frontera entre Venezuela y Colombia temporalmente. E frontera lo permanece cera pa 72 ora cuminsando desde awe dialuna 12 di december.
E medida tuma ta pa combati e contrabando di biyetenan di 100 bolivar. E idea ta pa remplasa e biyete aki cual ta esun di mayor denominacion cu un moneda. E biyete riba su mes lo keda sin balor desde 16 di december awor y tin miedo cu lo purba sea bin cu contrabando of falsifacion di e biyetenan aki for di Colombia. Tambe a keda anuncia cu e idea tey pa bin cu biyetenan di 20, 50 y hasta 100 mil bolivar pero no a duna specificacion pa ki tempo esaki lo ta. Locual no ta duidelijk ta si esaki tin un efecto negativo den e relacion entre e dos paisnan bisiña.
Algun tempo atras Bon Dia Aruba a trece un relato riba e devaluacion di e Bolivar y ki efectonan esaki tin pa e pueblo di Venezuela. Keto bay tin problemanan serio pa cu e dollar y esaki sin duda ta afectando hasta companianan nacional manera PDVSA kende lo mester ta e financiador pa CITGO aki na Aruba.
Bon Dia Aruba lo sigi busca informacion riba e tema aki y lo presente un serie di articulo.
