POR, por haci e diferencia?

editorial-logo.jpg

Partido nobo ta enfoca e.o. riba transparencia

Acto di fundacion di e asociacion politico nobo POR a tuma luga ayera den Cas di Cultura. Un sala casi yen di simpatisante a presencia presentacion di candidato pa eleccion y e directiva den su prome composicion. Den e puntonan di principio y metanan general naturalmente lo no tin tanto diferencia cu loke otro partidonan tin den nan metanan. Si por señala cu e partido a cuminsa cu pone dilanti tres hende muhe cu mester guia preocupacion di e partido pa e areanan di asunto social, deporte y enseñanza. Esaki talbes no ta tur, pero en todo caso areanan importante unda e partido ta señala cu e atencion den e ultimo añanan a keda atras y cu mester haci un intento mas grandi pa aumenta atencion.

Tambe a yama nos atencion cu den e discurso di lider Otmar Oduber a dedica basta atencion na e normanan pa cu transparencia y bon gobernacion. Futuro candidatonan por ehemplo, hasta prome cu nan asumi puesto di importancia den parlamento o gobierno pa e partido, lo mester duna cuenta di nan propiedadnan prome y despues di cada periodo di gobernacion. Tambe e partido nobo den e cuadro aki ta boga pa introduccion mas pronto posibel di e ley riba financiamento di partido politico. E ultimo aki riba su mes no ta asina remarcabel pa un partido politico adopta esey como punto di principio, pero ta trece na claridad cu actualmente e unico partido cu ta den silencio profundo tocante e tema di financiamento, ta e partido den gobernacion. E otro partido den oposicion a declara recientemente cu enfasis cu nan tambe ta boga pa introduccion di e ley riba transparencia financiero a corto plaso.

Palabra ta na partido AVP cu mester percura pa e proyecto di ley yega parlamento y te awor no ta mira nada. E ley tin añanan ta warda riba aprobacion y sigur den e periodo di gobernacion desde 2009, no a haci nada. Den campaña electoral di 2013 henter Aruba por tabata testigo di un campaña masha luhoso mes, cu mayoria di votado no a cuestiona. Por conclui cu e tabata un inversion cu a ‘bale la pena’, pa esunnan cu a inverti den esaki. Pero ken nan ta? Y pakico ta asina importante pa sa ken nan ta? 

Transparencia financiero no ta termina cu un lista di hende o empresa cu a haci donacion na un partido politico; esey ta e inicio. Despues, den curso di un periodo di gobernacion, mester verifica si a cambio pa donacion na partido politico un persona o empresa ta haya otro fabor en retorno, den forma di proyecto, persona den posicion clave den hunta di supervision di empresa y otro entidad estatal, etc. Si e lista no t’ey, tur cos ta keda pega den acusacion sin base, rumor cu no por comproba, mientras e partido en cuestion ta hariendo henter comunidad den nan cara y ta haci manera nan ta haya ta bon. Lo ta bon si den e proximo campaña banda di otro temanan, transparencia financiero haya un luga prominente den e debate. Y, ademas, manera bisa mas biaha, Aruba ta e unico pais den Reino cu no tin un ley asina na vigor.

Y ta realmente straño cu como ‘fabor’ na e partido na poder, no ta ni toca e tema aki den e consulta entre e parlamentonan di e paisnan den Reino. Por ta cu e otro paisnan no ta haya esaki un tema relevante ya cu nan si tin un ley asina vigente y funcionando. Pero e ora pa di tantisimo biaha e gobierno aki ta haya un oportunidad pa silencia e asunto y ta e unico cu ta sali gana den e asunto aki.

Den e proximo eleccion publicidad y control riba esaki via hopi recurso financiero pa domina e scenario publicitario ta di crucial importancia, pero no decisivo den tur sentido. Si e partido nobo aki ta di opinion cu tin un parti considerabel cu ta anhela un acercamento nobo den e forma di atende pueblo, esey lo bay proba su mes den algo mas cu nuebe luna.

Tur opcion sin embargo ta habri ainda. Ultimo eleccion na Merca a haci tur hende bira masha cauteloso ora ta trata di encuesta electoral y na Aruba ni e instrumento ey nos no tin pa midi e posibel sentimento den pueblo na e momento aki. Motibo mas pa acerca e situacion politico di e momento aki cu mente habri y cu disposicion di reconoce e realidad manera e ta desaroya nos dilanti. Un di e preguntanan cu mas ta tende ta cuanto e partidonan grandi lo perde na voto, pa motibo di e surgimento di e partido politico aki. Honestamente, como medio di comunicacion independiente, nos ta kere cu esey nos ta haya sa dia di eleccion. Loke ta importante ta yega na conoce e puntonan di bista di cada uno riba tur tema di interes. Nos ta sigui brinda e espacio ey na cada un.

Por ultimo, tabatin un ausencia di comentario riba un eventual unificacion cu Marisol Lopez Tromp den e partido. Tin tempo pa claridad riba esey.

You May Also Like

DSC_6178.JPG

Jeep a bolter pabou di rotonde Tanki Flip

Diadomingo anochi poco pabou di rotonde di Tanki Flip pa e caminda di Hato chauffeur ...

AZV: Ainda sistema di voucher ta den prueba

Minister di Salud Publico Alex Schwengle  den compania di director di AZV, Anco Ringeling a ...

‘Burocracia ta keda costa placa’

Un di e problemanan cu ta costando placa ta e ineficiencia cu tin den ...

Acuerdo firma ‘ICT Infrastructure & Data Center’ WEB

WEB Aruba y DELL a negocia pa varios luna y finalmente ayera a firma ...

Accion biblioteca a sigui 1.JPG

Bida di trahadonan di biblioteca cu problema di presion halto ta na peliger

Ayera e accion di e trahadonan di Biblioteca Nacional a sigui den su localidad ...