FTA ta desaproba cualkier medida di Riu hotel contra trahadonan di F&B cu a protesta

situacion trahado F&B Riu hotel Br.jpg

Sindicato FTA ta spera cu gerencia di Riu hotel no bin cu  medida disciplinario riba e grupo di trahadonan di e departamento di Food & Berverage cu a protesta pa motibo cu nan no ta contento cu e pago di nan service charge.

 

“Mi ta spera cu e accion cu a wordo tuma ta pa e control tuma luga mas lihe cu ta posibel; y preveni cu e situacion aki no bolbe presenta. Nos ta spera cu e compania no  ta bay tuma medida contra e trahadonan aki, pasobra nan a protesta”, presidente di FTA,. Hubert Dirksz a declara na Bon Dia Aruba.

 

El a declara  cu e accion aki a tuma luga diabierna siman pasa, caminda e grupo di trahadonan di F&B a protesta pa motibo cu nan ta haya cu e compania no ta pagando  nan corecto nan service charge. Ademas e grupo di trahadonan afilia na FTA ta haya cu e control cu ta wordo pidi y coordina dor di nan sindicato, ta tardando hopi. Mientras cu e compania no ta haya cu nan mester a bay acerca e trahadonan pa splica nan riba con nan ta atendiendo cu e pago di nan service charge te na luna di november.

 

“Nan a demostra nan mal contento pasobra e compania no ta actuando manera husto cu nan”, asina e sindicalista Dirksz a bisa. Ya den varios ocasion FTA  a reuni cu e trahadonan pa splica nan cu nan ta atendiendo cu gerencia di e hotel pa e control lo por tuma luga. Pero –segun e sindicalista- lamentablemente e gerencia no a mustra e parti di splica e trahadonan riba nan exigencia locual a trece cu e trahadonan a protesta.

 

Mas claridad  y derecho di protesta

E accion aki tabata di mas of menos un ora, caminda despues e trahadonan a bay traha bek. FTA  a  reuni cu gerencia di Riu hotel caminda nan ta para ariba cu e protesta tabata incorecto y no na su luga.  Nan ta argumenta cu den e contacto colectivo (CAO) tin un punto cu supuestamente no a wordo mira pa parti  riba e asunto aki.

 

Pero di otro banda, presidente di FTA a indica cu mas cu tin un acuerdo den e CAO, e derecho fundamental di tur trahado y di tur ciudadano di protesta, ta hancra den tur derecho cu e clase trahado tin, basta cu e ta  husto. Esaki ta e punto caminda tin discusion, pero FTA ta kere cu mientras cu e trahado tin e derecho ey “e por haci uzo di dje claro no na prome luga”, el a bisa.

Segun e sindicalista, gerencia di Riu Hotel ta para cu tin un palabracion haci cu na comienso di november awor lo bin hende di Spaña pa papia cu e accounting cu FTA a contrata pa haci trabou di control pa wak si e pago ta corecto,  y p’esey no mester tin  motibo pa protesta. Sindicalista Dirksz a bisa cu e punto di bista ey tin su validez pasobra november ta cerca caba. Pero di otro banda gerencia di e hotel aki mester compronde cu e trahadonan  tin casi un aña caba cu  ta reclamando riba e parti di e pago di nan service charge, ya cu nan ta haya cu e pago no ta corecto.

 

Segun presidente di FTA, e compania ta indica cu nan tin diferente motibo cu ta hustifica pa kico e pago ta asina. “E derecho di trahado ta keda cu mientras cu mi ta ricibi un pago, ta mi placa y mi kier haya un claridad.” Sr. Dirksz a bisa cu e unico caminda pa haya un claridad ta via un accounting pa haci e control respectivo.

 

FTA ta kere cu si nan por yega na un palabracion concreto cu na luna di november e control riba pago di service charge di e trahadonan di F&B lo tuma luga cu e  trahadonan , no tin motibo pa protesta mas. Mientras tanto e sindicato ta mira cu e compania a laga e trahadonan un  poco desampara,  sin informacion suficiente, locual a haci cu e trahadonan a protesta.

 

P’esey e lider sindical aki ta spera cu e compania no bin cu medida disciplinario contra e trahando cu a protesta. Sinembargo e trahadonan cu a protesta a wordo manda cas cu pago y pendiente riba otro medida.  “Nos ta desaproba esaki totalmente.”

 

Bon Dia Arub lo purba di haya e otro banda di medaya tambe di parti di e hotel RIU.

 

 

You May Also Like

Trinidad ya a publica na april riba composicion di tarballs

Mientras gobierno ta bisa cu nan no sa ainda kico ta e composicion di ...

Famia cansa cu criadero di sangura

Un famia na Tanki Leendert ta cansa cu criadero grandi di sangura cu tin ...

Mucha di cinco aña supuestamente maltrata door di mayornan a fayece

Ayera mainta a circula un publicacion riba Facebook relaciona cu un mucha cu a ...

Delta Airlines a haci ultimo vuelo pa Venezuela

E aerolinea Mericano Delta Airlines a realisa su ultimo vuelo desde Maiquetia pa Atlanta, ...

1ClinicaMedellin.jpg

Clinicanan di Medellin buscando mas relacion cu Aruba

Sra. Ana Maria Moreno di San Vicente Fundacion a bisa cu nan ta haciendo ...

Fin di un siman agita; Awor trabao di goberna ta cuminsa

Ayera nochi a conclui un siman bastante agita di tratamento di presupuesto. Desde siman ...