Durante un conferencia di prensa cu Fundacion contra Cancer di Prostaat a ofrece ayera pa e medionan local, nan a duna di conoce cu ta importante pa comunidad ta informa y asina fungi como punto di sosten pa hende homber cu ta sufri di cancer di prostaat.

Jurgen Benschop, Presidente di Fundacion contra Cancer di Prostaat Aruba, a papia tocante un campaña nobo di conscientisacion di Cancer di Prostaat cu a cuminsa ayera mes, hunto cu DVG, Konigin Wihelmina Fonds y Freeway Creative Agency. El a destaca cu e malesa aki ta di top 3 di cancer na Aruba, despues di cancer di cuero y cancer di pecho, y esaki ta un cancer hopi comun cerca hende homber. Loke ta importante ta e conscientisacion di e comunidad, pa esaki no ta un taboo mas.

Riba un averahe, Benschop a bisa cu tin 40 caso nobo pa aña cu ta wordo constata di cancer di prostaat na Aruba. Mundialmente 1 di 9 homber ta wordo diagnostica cu esaki, pero asina tambe hopi hende no sa cu nan por sobrevivi cu esey.

Di mesun manera, Benschop a señala cu un di e metanan di e fundacion ta pa papia y conscientisa e comunidad cu e cancer aki por wordo cura, basta e wordo diagnostica trempan mediante un test nobo di sanger, cu por haci na cualkier laboratorio pa garantisa un comunidad sostenibel.

Tambe tin un par di factor di risico. Un di nan ta si un persona tabatin cancer den famia, y den e caso ey ta consehabel pa haci e test trempan. Ademas, si e persona ta riba 40 aña tambe mester haci test. Benshop tambe a recomenda pa biba un bida mas saludabel, no come cuminda hopi procesa y haci ehercicio, ya cu un bida saludabel ta un factor hopi importante den prevencion di tur tipo di cancer y malesa en general.

Jurette Croes, relacionista publico di departamento di Salubridad Publico, a expresa cu e tarea di e departamento tambe ta pa conscientisa comunidad riba factornan di risico of malesanan cu ta afecta nan salud y con nan por preveni esaki.

Tocante cancer di prostaat, el a destaca cu esey ta un topico cu tur hende tin cu pone atencion riba dje. E cifranan cu nan a publica for di servicio di epidemiologia ta indica cu na Aruba, 138 persona ta muri pa aña pa un of otro tipo di cancer.

Croes a informa cu esaki ta e causa number 6 di morto den hende homber, cu un averahe di 13 morto pa aña pa motibo di cancer di prostaat.

Croes tambe a sigura cu pa DVG ta hopi importante pa sostene e campaña aki, pa hiba e mensahe pa comunidad. “A yega e ora pa nos hombernan papia mas riba e topico aki y pa nan bay haci nan test”, el a comenta.

Di su parti, Lili Prince di Konigin Wihelmina Fonds a destaca cu esaki ta e momento den cual nan ta apoya e Fundacion contra Cancer di Prostaat Aruba, cu a lanta na 2012 pa conscientisa cada homber den comunidad.

“E ser humano tin miedo di confronta e realidad, pero miho bo confronta e realidad awor pa despues bo no lamenta”, Prince a splica.

Johan Stoppels di Freeway Creative Agency a duna di conoce cu nan a cuminsa cu e campaña aki pa motibo cu niun hende homber ta gusta papia riba dje y nan a purba di bin cu un forma di yega mas cerca na tur homber, no solamente di 50 aña bay ariba, sino esunnan mas hoben tambe por cuminsa controla. “E conscientisacion ta pa esunnan cu ta mas hoben ainda, pasobra nan ta pensa cu nan tin cu bay dokter y haci test incomodo, esey no ta asina mas”, Stoppels a bisa.

Pa finalisa, el a informa cu den e campaña cu nan ta presenta tin hende homber di e comunidad mes cu a ser diagnostica cu cancer di prostaat pa duna nan mensahe.

 

LEAVE A REPLY

Please enter your comment!
Please enter your name here