Fundacion Elizier: cambiando bida di adictonan

Den e temporada aki nos corant ruman Aruba Today ta para keto tambe na e fundacionnan cu ta haci trabou social necesario pa diferente grupo den nos comunidad. Bon Dia Aruba tambe kier pone atencion riba nan y e biaha aki nos ta publicando e storia riba fundacion Eliezer.

Ora di drenta e 15.000 meter cuadra tereno di Eliezer ta manera bo ta drenta e hardin di Eden: un cunucu cu naturalesa bunita, animal, agricultura, green house y un parke. Cuater hende ta asisti diariamente 15 homber cu a perde caminda durante nan bida. Nan ta adictonan, di alcohol, droga y ta biba awor na Eliezer pa rehabilita.

Motor tras di e fundacion ta doño Gino Frans cu tabata un adicto tambe te ora ‘Dios a yam’e y sak’e for di e bida ey’. “Dios a liber’e pero tambe a haci un splica p’e cuminsa yuda otro. Asina tur cos a cuminsa”, su casa Monica Frans ta splica.

E clientenan ta cuminsa nan dia 5.30 di mainta cu resamento. “Nos ta tuma un seccion di Bijbel pa dedica nos mes y cuminsa e dia positivo”, asina secretario Robert Zara ta splica kende ta un di e cuater trahado. “Despues tin desayuno y nos ta cuminsa cu e trabou. Tur cliente tin nan trabou describi y responsabilidad.

Vanessa Maduro ta encarga cu administracion y ta e trahado social. “Merdia nos ta come hunto, despues nan ta drumi y 3.30 pm nos ta studia Bijbel. Diasabra nan ta bishita nan famia. E ta obligatorio pa e famia busca nan y hiba nan bek. Si nos tin duda, nos ta test nan pa wak si nan ta yega bek, clean. Si esey no ta e caso, nan mester cuminsa e tratamento di nobo, pero dobel mas pisa.”

Esey ta nifica cu en bes di detox 2 luna, e periodo ta extendi pa 4 luna. Den e periodo aki e cliente no tin contacto cu e mundo pafo, sin cell, sin bishita, nada. “Prome cu bo ta sigui e programa, nos ta duna bo un siman pa prepara bo mes. Bo mester scoge completamente pa haci esaki, sino e no lo traha”, sra. Maduro ta splica.

Cambio di bida
Cliente Anthony Arends tin 4 luna kedando na Eliezer. E tabata adicto na droga y alcohol. “Mi tabata cansa di mi bida. Mi tabata kier cu un cambio y si bo kier’e, bo por logra. E tabata duro na comienso, pero bo ta drecha na caminda.” E ta bisa cu e ta sinti su mes na cas na Eliezer y cu e programa ta dun’e un comienso nobo di su bida. Tambe e ta sinti cu e por contribui. “E ta manera un baby cu ta siña cana. Tur bo mester siña bek. Ami ta gusta cuida e cabay- y buriconan. Mi meta ta pa mi tin mi mesun cabay y por ta mi mesun cunucu. Mi ta mira mi futuro.” Sr. Arends ta un lider awor, yudando clientenan nobo y su persistencia ta dunando e otronan forsa. “Mi kier yuda, Dios a manda mi aki.”

Monica y Gino Frans a cuminsa cu e fundacion na Hulanda, pero sr. Frans tabata sinti cu tabatin necesidad na Aruba y asina a cuminsa traha. Riba caya prome. “Nos no tabatin nada otro cu nos fe, esaki tabata na 2008/2009. Despues nos a topa cu un adicto di alcohol y el a ofrece e casa grandi aki, pasobra e tabata gusta kico nos tabata haci. Poco poco e clientenan a cuminsa kere den nos y bini buscando nos ayudo.”

E ta sigui conta cu e doño Hulandes Fred Wappenaar a ofrece su tereno. “Nos ta hopi gradici na dje. E conexion cu bestia, un molina di awa, pa ta sostenibel y siña nos cliente cultiva y cuida, esey tur ta parti di nos vision.”

6 aña nan ta existi awor y banda di e fundacion nan a lanta La Posada Care Farm. Nan no ta laga nan clientenan bay facil ora nan ta cla cu nan tratamento. Despues di un periodo averahe di 6 luna estadia, nan ta keda den contacto cu nan cliente y yuda reintegra den comunidad.  “Den futuro nos kier tuma nan den servicio como empleado den nos negoshi di hydroponics. E no ta facil pa nan pa haya trabou y nos no ta mira nan pasado. Nos ta kere den cambio”, asina sra. Frans ta bisa.

Esunnan cu ta interesa di yuda e fundacion y of kier bishita e cunucu, por tuma contacto cu Eliezer. Por yama riba 561-3792 of haya nan online of riba Facebook.

You May Also Like

‘Laga marinier haci tarea di polis ta un falta di respet’

E parlamentario y lider di fraccion di MEP, Rocco Tjon a expresa cu e ...

image.jpeg

Trabounan tumando luga riba nos careteranan

Departamento di Obra Publico ta informa pueblo di Aruba en general y specialmente nos ...

Un sistema di riool central pa proteha nos lama y pais

Prome resultadonan di e barco di investigacion Pelagia ta mustra cu lama- y beachnan ...

Cana pa topa cu Donald Trump riba sexual harassment

Karin Bosman, e fundado di About Workplace Harassment (AWH) cu a cuminsa cu su ...

Poco hende interesa den conmemoracion victimanan segunda guera mundial

Tur aña riba dia 4 di mei ta tuma luga un conmemoracion di segunda ...