Fundacion enseñansa publico ta prioridad?

Ta kita atencion di otro prioridad…

Den tempo record e intencion di e ministro encarga cu enseñansa pa hinca e departamento di scol publico den un fundacion,  a logra silencia cualkier discusion riba cualkier otro tema relevante di e sector aki. Y esey ta un efecto cu dificilmente por keda asina. No ta bay pa ripiti aki e puntonan di bista cu ta confronta otro, e ministro di un banda cu su insistencia, y un grupo considerabel di esunnan cu ta traha den e sector, cu apoyo di varios parlamentario di e propio banda gubernamental, cu tin nan interogante tocante varios aspecto.

Actualmente, despues di algun siman di debate candente, e pregunta ta si ta bale la pena laga e tema aki kita tur otro tema for di caminda, mientras cu loke mester ta prioridad, ta loke ta formula den e acuerdo di gobierno 2017 – 2021. Cu de paso, ni cuanto nos lesa, no ta contene e medida aki den maneho di scolnan publico. Esey no ta implica automaticamente cu e ministro no por desea di haci esaki, pero e ora mester splica bon cla ta kico ta e bentahanan, specificamente pa e diferente interesadonan. Nos no ta papia aki di deseo di docente, simplemente kico ta e bentahanan di e maneho a traves di un fundacion. Cu nos a comprende te awor, a bisa cu e no ta trece bentaha financiero tampoco, por ta cu e ta facilita trabao pa e ministro mes, cu no kier ta meti den e detayenan di maneho diario di e scolnan publico. Pero esey ta un aspecto cu e por scoge pa haci actualmente caba, simplemente e ta duna mandato na e funcionario publico pa asumi responsabilidad pa e tareanan ey. Den pasado tabatin ministro cu riba nan mes a dicidi cu nan no ta tuma decision den cierto responsabilidad y ta laga na e funcionario mas halto pa haci esaki.

Asina nos a mira den pasado e ministro encarga cu husticia a laga otorgamento di permiso di residencia na e director di e departamento concerni, mientras cu despues otro ta haya cu ta e mes mester firma. E ultimo alternativa aki tabata naturalmente un locura, sigur si e tempo ey bo tabata papia di como 20.000 permiso pa aña. Esaki ta mas o menos un tarea completo di ocho ora pa dia durante henter aña. Anto asina den sentido practico tambe, tin cierto tarea cu un ministro, pa control freak cu e por ta, no mester desea di haci mes. Si e ministro den e caso actual ta desea di haci esey, nos por comprende completamente.

Di tur manera lo ta bon pa reconsidera su decision inicial, independientemente cu e tin rason of no, pero pasobra e rumbo actual ta crea un ambiente cu no ta faborabel pa ataca e lista largo di problema cu segun e acuerdo  di gobernacion 2018 – 2021 mester haya atencion. Nos ta djis menciona algun.

Por ehemplo, e extension di orario di scol, pa inclui materia extra curicular manera arte, musica, arte visual, tecnologia y deporte den oranan di atardi. Esaki ta sumamente necesario, pasobra e por yuda den e problema social grandi unda tin ambos mayor trahando, o di mucha cu un mayor soltero cu ta traha, limitando asina e peligro cu muchanan ta core den e oranan di atardi actualmente. Despues di e sucedidonan reciente, no mester di splica tanto pakico. Un otro prioridad ta e necesidad di mehora e resultadonan di enseñansa, pa cuminsa na e base, cu ta na un nivel abou. Esaki so caba ta rekeri inversion di recurso cu nos no sa ainda di unda nan mester sali. Y por fabor no cuminsa di biaha cu critica pakico nos no a menciona tal o cual aspecto  o problema, pasobra nan ta demasiado pa menciona: e capitulo di enseñansa den e acuerdo di gobernacion mes ta abarca mas di cuatro pagina, mencionando un sin fin di aspecto, tur ta importante.

Den cada asunto di e lista largo aki, lo mester por conta, te cierto grado, cu e colaboracion di esunnan envolvi. Nos no tin e impresion cu den e prome lunanan di gobernacion ta poniendo e base pa e colaboracion aki. Transforma enseñansa ta un di e tareanan mas dificil pa ehecuta, no cerca nos so, sino na cualkier pais. Cu esaki nos no ta bisa cu den tur cos e personal docente y nan representacion sindical tin rason, o cu nan punto di bista ta e unico pa considera, pero logra algo den e cuatro añanan aki no ta bira facil cuminsando asina.

Finalmente, un consideracion cu kisas no a bin dilanti ainda. Por ta cu e ministro kier independisa e Dienst Publieke Scholen pa pone e nivel mas halto di funcionario publico bao di un supervision di pafo? Podise den su vision no ta trata tanto di antagonista e docentenan, sino mas bien di haya grip, via un nivel di supervision nobo, riba operacion di e departamento? Si esey ta asina, anto tin otro metodo pa logra esey, si acaso e ta un meta di prioridad. Contal cu nos ta bayendo den un guera di trinchera cu no lo beneficia e eficacia di e ministerio pa ehecuta e plan di gobernacion.