Home Local Colombianonan na Aruba a vota den incertidumbre entre ‘derecha y izquierda’

Colombianonan na Aruba a vota den incertidumbre entre ‘derecha y izquierda’

461

Ayera, cantidad di Colombiano residencia na Aruba ta probechando e delaster dia di eleccion pa nan haci uzo di nan derecho democratico pa vota pa congreso di Colombia, kiermen senado y camara di representante.

Nan a bay vota den e mesun edificio unda consulado di Colombia ta situa na Oranjestad. Durante henter e siman, e eleccion aki a wordo desaroya for di 8or di mainta te cu 4or atardi. Na Colombia tabata un dia so di eleccion, esaki tabata ayera.

E eleccion aki ta pa eligi e miembronan di congreso y tambe pa esun interesa pa participa den un consulta popular inter-partidista. E consulta aki di e partidonan di ‘izquierda y derecha’,  ta pa scoge e candidatonan cu ta bay participa den e eleccion pa presidente y vice presidente pa dia 27 di mei venidero. E ‘Gran consulta por Colombia’, lo eligi e candidato unico di derecha, entre Iván Duque, Marta Lucía Ramírez y Alejandro Ordóñez.

Eleccion na Aruba

Ex-presidente di Asociacion Amigos di Colombia, Marielis Tejada, kende a fungi como un di e huradonan di votacion, a declara na Bon Dia Aruba cu e echo cu e Colombianonan den exterior y particularmente na Aruba por vota ta algo masha di balora. Na e ocasion aki e por a ripara cu e interes y participacion tabata mas grandi cu den ocasionnan anterior. “Cada biaha mas Colombianonan den exterior  ta mas preocupa pa e situacion di nos pais. Esaki ta algo extraordinario!”

Sra. Tejada a laga sa cu e hendenan jong kende pa prome biaha a bay vota, a ricibi un certificado di reconocimento. “Esaki ta extraordinario, nunca prome a yega di wak e cos aki.” Un inkietud comun cerca un gran cantidad di votado tabata: Pa kende mi por vota? E echo cu nan ta bibando pafo di nan pais ta haci cu algun di nan no ta mucho interesa riba e realidad politico di nan pais. Segun sra. Tejada e inkietud di e votado tabata mas tanto con nan ta bay vota, con nan ta busca e candidato di nan preferencia riba e tarheta di votacion, pero algun di nan ta informacionnan cu lamentablemente como hurado imparcial nan no por duna, ya cu esaki ta prohibi. “E persona mester bini cu pleno conocemento pa kende e tin cu vota.”

E eleccion aki a wordo celebra den completo ordo y bon organisacion. El a felicita e consulado y e diplomatico encarga, pero tambe tur e ekiponan di trabou cu a percura pa eleccion por a keda realisa exitosamente.  “E tabata un bon organisacion y bon informacion”, el a laga sa. Cada ciudadano tabata haya informacion na cua mesa e mester presenta su cedula pa obtene e tarheta di electoral pa vota y pa despues deposita den e urna di votacion.

Polarisacion

Mas cu 1500 Colombiano ta registra den nan censo electoral di nan pais pa vota na Aruba. Mientras na Colombia considerando e record historico di votado, alrededor di 16 miyon di Colombianonan a bay vota ayera. E biaha aki e eleccionnan pa Congreso tin algun particularidad masha singular. Un di nan ta e  confrontacion ideologico pisa cu e presencia di ex-guerrilla di Farc cu ta participa pa prome biaha den eleccion. Pero tambe e denuncia grandi di corupcion cu ta trece cu esaki un opinion publico desfaborabel contra varios miembronan di e organo legislativo aki. Pero di otro banda e partido Centro Democratico (CD) di ex-presidente Alvaro Uribe, kende a yega di obtene e di dos mayor votacion pa senado cuater aña pasa. CD a consolida su mes como e partido principal di oposicion cu e posibilidad di logra un cantidad di voto den eleccion di ayera.

Segun un votado consulta pa Bon Dia Aruba, ‘e eleccion aki ta uno crucial y importante mirando cu e pais Colombia ta practicamente polarisa entre e hendenan simpatisante di izquierda y esunnan di centro-derecha’. Nick Alfonso Barraza ta un Colombiano residencia basta aña na Aruba. El a bisa cu a pesar cu e ta biba pafo di Colombia, como tur ciudadano di su pais el a bay eherce su derecho di bay vota. “Tur Colombiano mester cumpli cu e derecho aki pa asina e por tin un bos na momento cu e tin cu papia. Pasobra e persona cu no ta bin vota no tin derecho di opina ni bisa nada.”

E ta haya cu eleccion aki ta masha importante pa Colombia su historia politico. “Nan ta un eleccion mas pisa cu esunnan anterior, pasobra e lucha ta pa poder y pa e pais por bay dilanti.”  E biaha aki e tendencia politico di derecha y izquierda ta mas marca na Colombia. Sr. Barraza ta haya cu esaki ta un ‘pelea di tiger cu burico mara’. Sinembargo Colombia su pueblo tin e poder di dicidi e pais su futuro. P’esey e ta haya relevante pa tur hende por sa pa kende e mester bay vota, ya sea izquierda of derecha.