Fundacion Family First Aruba (FFF) a inicia na luna di februari 2013 su prome Centro pa Prosperidad di Bida na Savaneta, cu e obhetivo di yuda fortalece y restaura famianan y individuonan di dependencia pa un independencia mas saludabel.

Family First Aruba ta kere cu cada persona tin un deseo profundo di libertad, siguridad, speransa, autoestima y oportunidad di haci un contribucion pa e famianan, comunidad y henter mundo.

Durante un entrevista cu Bon Dia Aruba a tene cu director di FFF, Jennie H.T. Lion Sjin Tjoe, el a duna di conoce loke nan a haci na 2019 logrando pa asisti famianan y personanan pa fortalece relacionnan por medio di nan programa y actividadnan.

Cu nan vision, “Famianan Sano pa un Aruba Prospero” Fundacion Family First ta traha primordialmente riba e aspecto di “relacionnan sano y fuerte.”

Lion Sjin Tjoe a comenta cu nan tabatin e cantidad di 205 famia cu 359 mucha, e aña aki nan a haya 36 famia nobo cu a drenta den nan programa segun nan necesidadnan y su individuonan, nan a ofrece orientacion, asesoramiento, asina como tambe sosten cu problemanan den matrimonio, relacion financiero y parental.

Lion Sjin Tjoe tambe a declara cu e aña aki nan a haya reconocimento di nan trabou pa minister di Asuntonan Social Glenbert Croes y di CrisisPlan Social, den mesun momento nan a organisa un evento pa famianan denomina ‘Family Fun Day’ y ademas un ekipo di FCCA a pidi pa nan pa yuda un bario recien estableci na Sabana Basora cu algun di nan programa.

Asina mes, departamento di Atencion Social na KIA tabata desea pa FFF ofrece klasnan financiero pa e personanan deteni, pero nan a pone ‘Proyecto KIA’ den espera pa motibo cu KIA no tabatin presupuesto pa e curso aki por tuma luga, Lion Sjin Tjoe a expresa.

Na luna di maart, nan a participa na Aruba Doet y tambe nan a organisa un ‘Scavenger hunt’ pa e hobennan di Imelda Hof y OC (Orthopedagogisch Centrum) esaki tabata cu ayudo di shete studiante di facultad di Trabou Social y Desaroyo di Universidad di Aruba.

Otro proyecto di nan ta pa consolida famianan tabata e retiro anual di pareha conoci como ‘Conoce bo pareha’ den cual nan a duna e hermentnan y informacion valioso pa nan boluntario profesional ora nan a traha cu nan meta na largo plaso, nan mision y vision como famia.

Tambe, Lion Sjin Tjoe a bisa cu nan ta atende cu casonan di famia “one on one”, cu ta sea tuma contacto cu nan directamente, of via referencia por medio di colaboracion cu otro partner y stakeholders riba e plataforma social.

Pa e dianan di fiesta Fundacion Family First a reparti algun macutu di Pasco na e grupo di famia cu a asisti evento di “Family Fun Day,” recompensando nan asina pa nan participacion y alabes deseando nan feliz dianan di fiesta, un Bon Pasco y un Feliz Aña nobo.

Basa riba e hecho cu famia ta keda e fundeshi riba locual un comunidad sano ta wordo construi den 2020, Lion Sjin Tjoe a duna di conoce cu FFF lo sigui asisti comunidad cu nan programa y eventonan anual existente, manera nan seminarionan titula: “ Tatanan Campeon, Guia Financiero, Conoce bo Pareha (retreat) y eventonan como : “Family Fun Day y Youth Scavenger Hunt”.

Nan grupo di hende muhe yama, ‘Muhenan Determina’ lo sigui contribui na proyectonan special den comunidad y tambe organisa actividadnan recreacional pa hende muhe di tur edad. Cu esey nan ta invita hende homber pa cuminsa un grupo di recreacion y sosten cu e mesun intencion.

Pa finalisa, Lion Sjin Tjoe tambe a manifesta cu nan tin plania crea programanan adicional desaroya pa aña 2020 cu e meta pa personanan por logra alcansa un interdependencia sano den nos comunidad, percurando asina resultadonan fuerte pa cu nan capacidad como persona, miembro di famia, miembro y cargadonan di comunidad, cu lo resulta den e avance di e pais.

Hende interesa di tuma contacto cu Fundacion Family First por yama oficina 582-0099 of celular 699-9928.

LEAVE A REPLY

Please enter your comment!
Please enter your name here