Fundacion Parke Nacional Aruba ta abusa di su poder, pero mas ainda, no por basa su mes riba ley pa stroba vehiculonan off road drenta e areanan natural.

Esey abogadonan mr. Anthony Ruiz y mr. Meylanie Kelie a argumenta den e caso sumario cu Fundacion Offroad Aruba a entama contra FPNA. Esaki despues cu e fundacion cu ta maneha e parke a bin cu decision pa stop All Terrain Vehicles, ATV y limita tours di UTVs. FPNA a basa su decision riba un estudio di impacto di e cantidad di trafico.

Durante e tratamento di caso cu a dura cuater ora, a trece dilanti cu FPNA ta e organo cu e tarea publico pa maneha e parke nacional y cu e Minister di Medio Ambiente ta esun responsabel. Segun e argumento di e abogadonan, Fundacion Offroad Aruba, FOA, ta de acuerdo cu pa proteccion di naturalesa ta importante cu tin regulacion di tur vehiculonan ‘Offroad.’ Hasta ta asina cu doñonan di companianan cu ta ofrece vehiculo off road, ORV, a manda carta pa Gobierno pa regula e actividad y te ainda no a haya contesta.

Ta reconoce cu tin dos aña ta tende cu ta bay bin cu maneho y cambio di ley, pero e forma con a trece cambio a laga FOA malamente sorprendi cu e contenido di maneho y cu e tempo di implementacion. A duna solamente tres siman di anticipacion y a haci e anuncio net den e temporada di crisis di Covid19. “FPNA no ta solidario cu hende cu ta perde trabou,” mr. Kelie y mr. Ruiz a argumenta.

Di otro banda no ta prome biaha cu a tuma un actitud asina, segun Kelie. Na Maart 2019 a avisa cu ta sera e caminda di Shete pa Conchi, y a haci’e den apenas tres dia. Y segun FOA, e caminda di Shete ta uno publico y FPNA no tin autoridad pa sera caminda publico. E abogadonan a trece dilanti cu un caminda publico, hasta den parke, ta cay bou otro areglo di ley. E leynan di FPNA no ta kita cu tin ley di traficio y e Minister encarga no tin e autoridad pa determina esey tampoco. Pa FPNA, unicamente e caminda di asfalt ta caminda publico, pero ley di trafico ta bisa cu camindanan di santo cu ta den uzo publico pa mas di 30 aña tambe ta caminda publico. Pues, den concepto di FOA, e ruta di Shete ta uno publico y FPNA no tin autoridad pa sera esaki.

Negociacion

Durante e tratamento, FOA a mustra huez cu no tin ni necesidad pa manda e partidonan negocia. “E partidonan ta hopi leu di otro, particularmente pasobra segun FPNA, tur e companianan cu ta ofrece tour cu ORV ta mesun malo cu otro. Pio, nunca a mira e companianan aki como partidonan cu tin interes ora cu a formula maneho. Simplemente a selecta cua tipo di vehiculo por drenta si of no. Y esey no ta tarea ni di FPNA ni di MInister di Medio Ambiente, ademas cu e ta bay contra e principio di trato igual.”

E ley di FPNA ta bisa explicitamente cu e area mester ta accesibel pa tur hende. Y articulo ocho (8) di e ley berdad ta duna FPNA e autoridad pa prohibi acceso na cierto area. Locual e ley no ta haci, ta permiti acceso segun preferencia. Pues e prohibicion mester conta pa tur y no djis algun.

Molester

FPNA a bisa cu mester contraresta e cantidad di molester cu tin den parke cu ta funesto pa flora y fauna. Esakinan ta zonido, sushedad, eficiencia di transporte y siguridad. Pero den e rapport riba cua a basa e maneho pa limita vehiculonan ORV, estudionan solamente a enfoca riba stof y siguridad. E abogadonan a cuestiona e calidad di investigacion cu FPNA a haci cu unicamente a tuma cuater (4) dia y despues, dos luna di observacion durante e periodo cu parke tabata sera na April y Mei di e aña aki. E conclusion pa limita companianan di ORV ta mucho grandi pa un estudio asina limita, sin sikiera bin un periodo di transicion. E estudio ademas a enfoca solamente riba e ruta di Sero Arikok pa Conchi. E material fotografico presenta pa FPNA no por ta representativo pa henter e parke, segun abogadonan Ruiz y Kelie.


Stof

Un di e kehonan grandi ta cu e tournan di ORV ta produci hopi stof. Sinembargo un estudio di Teun Vogel a ilustra cu mas pisa un vehiculo ta, mas stof e ta produci. Consequentemente un jeep grandi cu 14 hende, ta pisa mucho mas cu 8 ORV cu dos hende of hasta cuater hende. Hasta un auto di persona ta pisa mas. E argumento cu un Jeep ta core riba caminda di asfalt tampoco ta uno husto segun Ruiz y Kelie, pasobra netamente un ORV ta diseña pa core riba caminda di santo. Y ta logico cu e ta lanta mas stof compara si e ta core riba un caminda di asfalt.

Velocidad

FPNA tin tur autoridad pa controla velocidad y FOA ta kere cu tin forma pa percura cu rangernan ta implementa e autoridad aki. Por pone rangernan riba e diferente rutanan pa controla velocidad. Ademas, un jeep grandi tin mas stabilidad, como tal por core mas duro cu un ORV, manera UTV. Pues e argumento di velocidad no ta uno valido, segun e abogadonan.

Zonido

Paloke ta zonido excesivo cu hopi ta keha di dje, FPNA no a presenta ningun estudio cu ta mustra cu ORV ta produci mucho zonido. Mas ainda, awendia tin ORV cu motor electrico cu no ta haci ningun zonido. Pa loke ta e argumento di siguridad tur vehiculo por trece peliger cu n’e, segun e abogadonan, y no por a mustra cuanto accident cu ORV tabatin den parke.

Ta cuestiona FPNA con a conclui cu e ORV ta destrui flora y fauna, y cu naturalesa a cuminza actua diferente den e poco lunanan cu e Parke tabata cera. Ruiz y Kelie tambe a cuestiona un publicacion di FPNA cu ta bisa cu e parke natural ta parti den tres zona, dos keto y uno pa trafico. Pasobra e stipulacionnan ey no ta describi den e ley, cu tampoco ta bisa cu mester tin menos trafico. “Parlamento nunca a mara condicionnan general na e ley. No ta mira unda e ley ta duna FPNA e autoridad pa hende drenta e parke basa riba condicion. Es mas, FPNA por rechasa personanan unicamente basa riba locual ta para den e ley y no basa riba su propio maneho. Hasta e posibilidad di cobra pa entrada ta un autoridad di Minister y no di FPNA.”

ROP

E plan di ordenanza teritorial y su rekisitonan, e ROP y ROPV, ademas di e Natuurbeschermingsverordening, esta e ley di Proteccion di Naturalesa, no ta stroba movecion di hende den areanan natural y areanan den disputa. Y riba dje, FPNA nunca a publica su maneho den un manera formal cu ta hacie oficial. Como tal, e traspaso di e 16 terenonan pa maneho di FPNA, cu ta inclui areanan rond di Arashi, duinen di California y e saliña di Tierra del Sol ta crea problema pa e companianan di ORV, pasobra nan ta haci uzo di tur pa nan negoshi. FOA ta teme cu FPNA lo uza so maneho pa stroba trafico y esaki ta un paso ilegal. “Un maneho asina ta contra ley y aki FPNA ta abusa di su poder. FOA ta kere den proteccion di naturalesa, pero tur banda mester tira awa den biña pa yega na un balans. E forma con FPNA kier proteha naturalesa no ta basa riba ley y esey no ta un ehempel pa muchanan,” ta e conclusion di abogadonan Ruiz y Kelie.