Ayera presidente di fundacion Pa Amor di Nos Aruba (PANA), Alberto Peret-Gentil, hunto cu e presidente di e Fundacion Nuevo Mundo, Simon Gollo a sostene un reunion cu prome minister Mike Eman pa concretisa e proyecto di bin cu un Orkesta Sinfonico di Aruba, integra pa muchanan y hobennan local.
Sr. Peret-Gentil ta laga sa cu PANA ta integra entre otro pa un grupo di empresario Venezolano cu kier duna algo bek na Aruba. Nan a bin cu e proposicion cu e miho regalo cu nan por duna na nos isla, ta esun di crea nucleonan di musica clasico. Nan ta Centronan di Excelencia di Musica Clasico pa muchanan di Aruba, manera ‘e sistema’ di musica crea exitosamente na Venezuela. “E proposicion aki ta bay mas leu cu e aspecto musical so. Ya cu e ta algo mas formativo di disciplina y trabou den ekipo pa e hubentud Arubiano.”
Orkesta sinfonico
E obhetivo final ta esun di crea un orkesta sinfonico infantil y hubenil na Aruba. Ya caba nan tin un director musical reconoci, e maestro Felipe Izcaray Yepez. Actualmente sr. Izcaray ta Director Artistico di e Sistema Nacional di Orkesta y Coro Hubenil y Infantil na Carora, Venezuela.
PANA a logra e donacion di tur instrumento musical di cuerde. Pero pa cuminsa ehecuta e proyecto aki nan mester di un sede of lokaal; y nan ta na spera di un contesta di parti di gobierno pa esaki por bira realidad.
E ta haya cu e proyecto aki lo ta uno cu lo yuda nos muchanan y hobennan. “Tin hopi di nan cu despues cu nan ta bay scol, nan no tin mas actividad pa haci. Un proyecto asina lo evita pa nan no cay den droga of bay riba un mal caminda. Pero fundamentalmente un proyecto asina ta yuda nan pa haya un bon formacion cu ta un cos fundamental”.
E formacion aki lo yuda nos muchanan y hobennan pa profila nan mes den diferente tereno y no musical so. “Mi ta kere cu no tin un miho regalo di un grupo di Venezolano pa Aruba cu esun di logra algo similar cu e maestro Abreu a logra na Venezuela.”
Igualmente sr. Peret-Gentil ta bisa cu fundacion PANA ta apoya e realisacion di e di tres version di Aruba Symphony Festival organisa pa Fundacion Nuevo Mundo. E festival aki cu ta uno academico y musical ta cuminsa dia 21 te cu 29 di juli na Cas di Cultura.
PANA a duna nan un contribucion economico; y ademas sitionan pa nan musiconan por keda durante e dianan aki. El a bisa cu e maestronan di musica aki tambe ta duna nan contribucion; ya cu nan ta bin duna les y toca practicamente gratis. “Nan ta bin duna nos un gran ayudo. Nan ta musiconan di prome nivel. Y nos ta aporta cu algo chikito”, e ta bisa.
