Fundacion Rancho preocupa cu desaroyo di proyecto Habor House

Clifford Rosa como presidente di fundacion Rancho ta vocifera su preocupacion cu e ultimo desaroyo cu ta tumando luga den bisindario di e pier di Rancho. Esaki tin di haber cu e proyecto di ex edificio Mar Azul cu a wordo ta carga e nomber di Habor House. E ta un proyecto cu ta consisti di 94 apartamento y 19 local comercial.

Esaki no ta e prome biaha cu e fundacion aki ta trece dilanti su preocupacion riba e riesgonan cu ta core cierto patrimonionan cu ta forma parti di historia y herencia cultura di e comunidad di Rancho. Nan ta premira cu nan ta core peliger pa cierto interes y proyectonan comercial den e area atractivo aki. Den pasado e Rancheronan a bataya pa preserva y conserva e pier asigna na nan piscadonan. Tambe e markthallen cu nan ta considera parti di nan patrimonio.

Bon Dia Aruba a yega di trece dilanti e punto di bista di e desaroyado di e proyecto aki. E ta un inversion di 30 miyon dollar cu lo beneficia e zona aki cu tabata practicamente bandona. Di un banda, nan kier rescata e edificio aki cu tabata para y bandona pa añanan. Un edificio fantasma cu den nan condicion no tabata haci atractivo e area aki. Nan a laga sa cu un di nan meta ta esun di embeyece e area aki di Oranjestad, situa cerca di nos waf di crucero den cuadro di e macro proyecto cu lo bin riba e area di ex waf di container. Tambe nan a laga sa nan disponibilidad pa drecha e facilidad y infrastructura cu tin cerca di e edificio aki cu lo beneficia e mesun Rancheronan. Nan tin pensa di bin cu un tipo di mercado tipico di piscado al estilo di antes pa e piscadonan mes por bende nan productonan.

Reunion
Sr. Rosa a bisa cu nan a tuma nota di esaki for di cu e informacion a sali den Bon Dia Aruba. Pa nan tabata un sorpresa di por scucha cu e desaroyado tabatin contacto estrecho cu fundacion Rancho. Como fundacion si nan a yega di duna e desaroyado algun indicacion di nan preocupacion den e area aki. Esaki a sosode bou e peticion di e minister di Infrastructura di e gobierno anterior, caminda fundacion Rancho tabatin e oportunidad di sinta cu e desaroyadonan di e proyecto Habor House .

El a splica cu e meta di e unico reunion cu nan a sostene cu e desaroyado tabata pa duna un poco di e vision di kico nan como fundacion ta mira pa e area. “Mirando cu nos como fundacion no tin suficiente fondo pa por desaroya proyectonan macro.”

Nan a sinta na mesa un biaha so cu e desaroyado aki, prome cu nan a finalisa e compra di e edificio via Notario. Despues cu nan a formalisa e compra cerca e notario, e fundacion no a sinta mas cu nan, segun sr. Rosa. “Y te awe nos no a sinta cu nan.” E fundacion ta dispuesto semper pa reuni y combersa cu nan.

Un punto cu si a resalta den e reunion aki tin di haber cu e envolvimento of tenemento di cuenta cu e fundacion aki cu ta representa e comunidad di Rancho, y muy specialmente e piscadonan cu tin den e pier cu ta cerca di edificio di ex Mar Azul of Habor House. Sr. Rosa a bisa cu e fundacion aki ta gradici Centro di Pesca Hadicurari pa por duna e apoyo y aporte pa nan por renoba e pier di piscado aki y duna e nomber di Waf di Rancho.

Sr. Rosa a trece dilanti cu den pasado otro desaroyado kier a bin cu algun idea pa desaroya e area, pero “lamentablemente su ideanan no por a wordo concretisa.” E ideanan aki tabata den pugna cu e interesnan di e comunidad piscado di Rancho. E tempo aya e fundacion tambe a haci su trabou pa frena cu e desaroyo ey.

E fundacion a yega di wak e edificio aki den diferente faceta, y te ainda no por concretisa e proyecto. Pa e motibo ey e fundacion a bisa pa e desaroyado nobo di e condominio “laga nos compronde otro bon. Mirando cu nos a pasa den un periodo di mas cu 10 aña cu tin un desaroyo eynan ficticio. Un desaroyo cu nos por wak un luga practicamente bandona.”

Envolvimento di Rancho
El a indica cu esaki no kiermen cu e fundacion no kier mira un desaroyo pa e area aki, pero nan kier mira un desaroyo garantisa. Tambe nan kier cu e desaroyo aki bay segun nan pensamento. Specialmente e areanan cu tin di haber cu nan cultura y historia cu tambe ta inclui e area di e markthallen. Tur otro desaroyo no tin problema. Pero si nan kier conserva entre otro e markthallen y e waf di e piscadonan. Nan kier mira un proyecto cu por conecta bek e bario di piscado aki na e waf, mirando cu esaki ta un parti cardinal di e desaroyo pa futuro di e bario y pa fundacion Rancho tambe.

Sr. Rosa ta mira cu cualkier desaroyo cu no ta bay segun deseonan di e habitantenan of piscadonan di Rancho, e fundacion lo t’ey pa sali na vanguardia di nan. Esaki ta un di e reforsamento cu e fundacion aki ta haya fei comunidad di Rancho. Pa e fundacion por ta e bos di e comunidad aki pa cualkier desaroyo cu tin di haber den e area di Rancho y sigur den e waf.

El a bisa cu esaki no tin di haber solamente cu e waf chikito manera den boca di pueblo ta wordo yama. Pero e tin di haber cu e area completo di waf “mirando cu e waf den general tabatin su impacto tambe riba e desaroyo di Rancho y su habitantenan.” Na inicio di e historia di e waf mes, mayoria di e Rancheronan tabata traha den e waf realisando trabou den e barconan mes of cargando y descargando barconan. Pues e ta haya cu semper e comunidad di Rancho tabata un posicion clave den e desaroyo di e waf, pero actualmente nan no ta mira esey mas.

E ta haya cu den e mudamento di e waf di container pa Barcadera, nan por mira cu tin un desaroyo pa futuro. Den e desaroyo aki nan ta trahando nan propio plan pa asina nan por tin algo pa ofrece na e desaroyado di e proyecto aki cu tin di haber cu Aruba Port Authority (APA). Nan ta den contacto cu e persona aki cu a bin fei Hulanda, specialmente pa haci e desaroyo aki. E ta reitera cu e ta un proyecto hopi grandi, pero tur proyecto mester tene cuenta cu e comunidad aki.

~

You May Also Like

Minister: Lo sigui trabou pa institui oficina di Interpol na Aruba

Minister di Husticia Andin Bikker ta confirma na Bon Dia cu lo sigui cu ...

Douana atrobe den accion

Awe mainta personal uniforma di cuerpo di Duana representa sindicalmente pa SADA a bay ...

Aura casino negoshacion.jpg

Directiva di grupo interesa pa opera ex Aura Casino lo bin Aruba

Aunke negociacion ta tumando luga keto bay,  pero ainda no tin un operador oficial ...

Ruman muhe (18) di victima di asesinato na de Vuyst deteni

Ruman muhe S.D.S di 18 aña di e victima di asesinato na de Vuyst ...

Yellow st (3).JPG

Yellow ta sirbi su sentencia na St. Maarten

Manera a indica varios siman pasa Yellow lo sirbi su sentencia di 18 aña ...

shaba pastry candela (12).jpg

Shaba Pastry aparentemente lo tabata na candela

Diasabra atardi den careda di 6:30 brandweer ta wordo pidi cu urgencia na Shaba ...