Fundacion Respeta Mi ta duna informacion pa mucha y hoben pa conscientisa riba abuso di mucha homber. Esaki ta inclui e señalnan cu por wak y kico por haci den casonan cu surgi.

Fundacion Respeta Mi den un anochi informativo a bisa cu abuso di mucha ta un tema delica pa comunidad di Aruba pero e anochi ta enfoca mas cu abuso di mucha homber cu ta un situacion preocupante. Nan a cuminsa splica cu lamentablemente dia pa dia ta abusando di muchanan sexualmente.

Nan ta bisa cu ‘mare niun mucha mester a pasa den un situacion di abuso’ sea cu e mucha ta testigo di violencia domestico, negligencia, abuso emocional, of abuso sexual. Nan ta bisa cu tur mucha mester ta proteha di tur sorto di abuso.

El a bolbe ripiti cu e charla lo ta poniendo enfasis riba abuso sexual di mucha homber. Segun Fundacion Respeta Mi mucha homber tambe ta vulnerabel y cu mester di atencion di comunidad. Ora ta papia di abuso sexual di mucha homber por ta no fisico y fisico.

Abuso sexual fisico.
Den e parti fisico di abuso contra un mucha, aki ta papia di situacionnan unda tin caricia of cualkier forma di mishimento inapropia manera mishi chanchan of pecho, kiermen mishi parti intimo of otro caminda unda e mucha ta sinti incomodo. Banda di esaki tin penetracion. Penetracion den caso di mucha homber ta pasa via anal sea cu obheto of penis. Esaki ta pleno violacion, si el a tuma luga, of e ta un intento pa viola si tabatin intencion pa yega na e tipo di abuso aki. Adicionalmente un otro forma di abuso sexual fisico ta encera sexo oral.

E fundacion ta bisa cu ta preferibel papia cu e mucha stret na e punto, en bes di sinta sconde pa via di berguensa, pasobra esey ta e realidad. Otro riba lista ta uza mucha pa pornografia. E ta remarca cu tin biaha e abusado ta tene relacion cu e mucha y haci un video y esaki nan ta bende na sitionan pornografico of e pedofiel por keda cu ne.

Abuso sexual no fisico.
Den e parti aki ta por ehempel ora tin fotografia indecente. E ta splica cu tin biaha e abusado ta prefera di no mushi cu e mucha pero uza e potretnan aki pa su mesun fantasia of tambe pone riba sitionan pornografico.

Algo otro cu abusado sa haci ta papia abiertamente tocante sexo pa shock e mucha of pa lanta e mucha su curiosidad. Otro punto ta permiti e mucha mira of scucha actonan sexual of material pornografico.

Fundacion ta bisa cu nan a bin cu un campaña di conscientisacion contra abuso sexual di mucha unda cu nan a saca 6 video di casonan cu a yega di pasa na Aruba, agregando cu mayoria di biaha e casonan aki ta pasa den famia. E por ta un tata, padrastro, omo, un ruman homber/ muher grandi, of algun otro miembro di famia. Un baby sitter, maestro di scol, personal di pasadia, lidernan di actividad hubenil.

E ta bisa cu e por ta un desconoci of un conoci pero un persona desconoci tin un porcentahe chikito y e chens cu famia ta involucra ta encera un porcentahe mas halto. Pa e motibo aki ta importante pa e mucha sa di chikito cu mishimento y abuso sexual no fisico no ta apropia y kico pa haci, y unda pa bay.

Estadistica globalmente y na Aruba.
Mientras mas chikito nan ta, mas vulnerabel nan ta. Fundacion ta bisa segun estadistica global di Unicef na 2016 mucha bou di 20 aña di edad, 150 miyon di mucha muhe ta wordo abusa sexualmente esaki ta 1 di cada 10 mucha muhe. Den e caso di mucha homber bou di 18 aña ta un 73 miyon cu ta 1 den 6 mucha homber ta wordo abusa sexualmente.

Nan ta bisa cu den caso di mucha homber ta bira mas dificil pa bisa pa motibo cu nan ta mas cera. Pa miedo y berguensa nan ta dicidi di no raporta un abuso. El a sigui splica segun estadistica di Bureau Sostene Mi a haya cifra di Aruba di abuso sexual di mucha bou 18 aña cual na 2015 tabata 39 caso raporta, na 2016 28 caso raporta y na 2017, 20 caso raporta.

Etapa di abuso.
E ta bisa cu ta importante pa niun mucha sconde un secreto, asina mes si abusado bis’e cu ta un secreto. E ta bisa cu hopi biaha tambe mucha ta conta nan mayornan cu nan ta wordo abusa sexualmente y mayor no ta kere nan. Ta importante pa den e casonan aki busca un ayudo y no keda keto. E ta un situacion dificil paso e persona cu ta supone mester proteha un mucha mes no ta kere den locual e yiu ta bisando.

Ora un abusado kier bay abusa di un mucha sexualmente prome e ta purba detecta con vulnerabel e mucha ta. E ta cuminsa studia su personalidad, su manera, asina e sa con pa por acerca.

Despues cu e abusado a detecta tur locual a por a haya sa di e mucha e ta bay haci e acercamento. Mientras mas chikito, miho pa e abusado, asina por domin’e mas facil. E ta cuminsa haci amistoso cu e mucha, sea hunga cu ne, of haci algun wega cu e mucha ta haya leuk na cuminsamento (esaki por resulta den contacto fisico inapropia).

Ora e pasa e etapa di amistad e ta bay pa manipula e mucha, e ta cuminsa cumpra regalo, of hiba cuminda p’e asina e mucha ta cuminsa crea un confusion y asina tambe por wanta e secreto di e abusado. E secreto ta bin ora cu e abuso cuminsa, asina e por menasa e mucha cu kita tur locual e ta dun’e y pa e cera su boca.

Señal of sintoma di abuso.
Durante un investigacion nan ta bisa cu mucha homber tin dificultad pa expresa su sentimento. E manera pa cuminsa duna señal of sintoma, e ta cuminsa mustra rabia, come huña, bringa cu ruman, y dificultad pa kita paña dilanti otro.

E mucha homber por cuminsa wak pornografia, e ta masturba (insaciabel). E por cuminsa expresa su mes cu tendencia homosexual y ta confundi den nan sintimentonan generalmente. Asina e circulo di abuso ta cuminsa. Esaki por tambe yega na casonan unda mucha mes ta abusa di otro mucha.

Na final nan a bisa cu lo kier bay na diferente scol na Aruba cu e team. Pa asina sigui trece informacion. El a bisa cu ta importante cu pa mucha sa cu ningun hende mag mishi cu nan curpa y pa reporta abuso di biaha.

LEAVE A REPLY

Please enter your comment!
Please enter your name here