Un homber di California kende a bisa cu e kier a bula den espacio pa mira si mundo ta rondo a fayece despues cu su raket traha na cas a bula den shelo di desierto y despues cay bek na Tera.
‘Mad’ Mike Hughes a fayece diasabra nochi despues cu su raket a accidenta riba propiedad priva cerca di Barstow, California. Waldo Stakes, un colega kende tabata na e lansamento di e raket, a bisa cu Hughes, di 64 aña di edad, a fayece.
Science Channel a bisa riba Twitter cu tabata grabando biahe di Hughes y cu ‘pensamento y oracion ta bay na su famia y amigonan durante e tempo dificil aki’.
Hughes tambe tabata un chauffeur di limousine, kende tabatin e record mundial Guinness pa ‘salto di rampa riba limousine mas largo’, pa bula 31m den un Lincoln Town Car stretch limousine, na un pista na 2002.
Un video riba TMZ.com ta mustra e raket despegando cu locual ta parce un parachute ta separa durante e lansamento. E raket cu energia di steam ta eleva, despues dura alrededor di 10 seconde pa cay bek na tera. Por scucha grito mientras e raket ta crash den desierto.
Periodista freelance Justin Chapman, kende tabata na e escena, a bisa cu ta parce cu e raket a dal den e aparato di lansamento, cu por a causa e problema cu e parachute.
Na maart 2018, Hughes a manda su mes alrededor di 570m den aire. El a lansa un parachute y despues un mas, pero toch tabatin un aterisahe duro den desierto na California y a lesiona su lomba.
El a bisa den un video cu su meta tabata pa eventualmente bula den frontera di espacio pa determina pa su mes si mundo ta rondo. “Mi no kier tuma niun hende su palabra”, el a bisa den un video, post riba website di BBC News. “Mi no sa si mundo ta plat of rondo.”
Hughes tambe a bisa cu e tabata kier ‘convence hende cu bo por haci cosnan cu ta extraordinario cu nan bida’.
