Ultimamente, y no pa promer biaha, nos ta haya e sensacion cu e gobierno aki tin problema cu prioridad. E ehemplonan reciente ta multiple y a bin dilanti caba den noticia. No pa teima, pero nos mester bolbe riba e caso di e personal cu e ministro encarga cu salubridad publico mester a ‘eclipse’ for di su despacho, y cu a costa un director su puesto na AZV. Supuestamente e no kier a colabora den e maniobra straño cu e ministro a ehecuta, cu finalmente no a conveni finanzas publico tampoco, aparte di e clientenan cu lo mester bay mira ainda si e servicio brinda ta na nivel.

Pero, mientras tanto, si e ministro tabatin gana den un pleito cu e director en cuestion, pakico e no a puntr’e con a para cu e casi miyon florin di placa di pueblo, cu a paga dos delincuente na laboratorio di Hospital pa servicionan ficticio cu Pap-test, cu supuestamente mester a bay Hulanda pa 190 euro cada un, y cu nunca a biaha… Si e director no tabatin un contesta adecua pa esaki, anto cu razon e mandatario por a cuminza un guera – civiliza – cu e director, de paso tambe cu Hospital y Laboratorio, pasobra te awe nada a sali afor, mientras cu Ministerio Publico y Hospital a confirma pa e corant aki cu a haci denuncia formal. Pero AZV, como esun cu a perde placa grandi, pa motibo di crimen, a busca drechi di e placa aki? Si no ta bay tin accion contra e ladronnan, cu segun nos a comprende a haya tur oportunidad pa bandona e isla, no ta bira tempo pa e mandatario cuminza pone orden, den nos nomber? Pakico aki si, de repente e no ta parce di tin ningun pura pa atende e asunto aki, cumpliendo cu su deber di defende y protege interes publico?No ta riba e tipo di cosnan aki nos mester evalua y huzga comportamento y cumplimento di un mandatario?

No ta pesey nos tin un parlamento, unda banda di oposicion tambe e miembronan di e partidonan cu ta sostene e coalicion tin e sagrado deber di cuestiona e conducta di nan propio ministro? O acaso nan no ta mind pa nos huzga nan mescos den e gobernacion anterior nos tabata critica esnan cu awe ta sinta na e otro banda den sala di parlamento, y cu, irespecto loke a pasa den pasado, awe tin e tarea di critica e cosnan cu no ta andando bon den e actual gobierno? O nos mester comproba cu nada no a cambia, cu di e miembronan cu ta sostene coalicion no por spera ningun actitud critico, ademas pasobra segun nan campaña electoral a cuminza caba. Como si fuera ta esey nos mester awor…

Loke a parce nos mas necesario actualmente ta pa atende e asuntonan clave di e momento aki cu diligencia y sin wega politico. Un di e piezanan central den esaki ta nos asuntonan financiero, unda tin mil y un cos pa regla y mehora. E ultimo reaccion di CAft riba e reportahe number 3 pa 2020 di gobierno, ta indica varios asunto cu mester atende cu diligencia. Tin varios keho riba mehoracion di e trayecto di control financiero, manera e realisacion di e ‘nulmeting’ cu aparentemente ainda no ta haci. Di e manera aki nos ta bay keda tambe sin declaracion aprobatorio di un accountant riba cuenta anual 2020, mientras cu e organismo di control a constata tambe cu e cuentanan anual di 2016, 2017 y 2018 ta carece di exactitud y cu no tin forma pa bisa cu e cifranan ta confiable… Riba tur esaki ta constata cu gobierno en berdad a baha algo di gasto di personal, a traves di a corta 12,5% di salario, pero no pasobra nan ta ehecutando nan propio Plan di Maneho di Personal (BVP). Pa esey lamentablemente nan no tabatin tempo, pero si pa sinta como Conseho di Ministro completo y yuda e colega di salubridad publico haci ‘opruiming’ den su despacho, mientras cu nos ta keda paga anyway.

Pa colmoe organismo di supervision financiero ta constata cu ainda gobierno tin cinco miyon florin poni un banda pa por contrata personal pa puesto vacante, y ta urgi gobierno pa usa esaki solamente pa puesto di importancia, relaciona cu e maneho financiero, manera e vacantenan na Centrale Accountantsdienst (CAD), cu ta tira pa añanan largo un banda sin cu nan por haya e personal cu nan mester. Y esaki bao di diferente gobierno, pasobra e ta un asunto di algun decada por lo menos. Ta cu ki cara ta bisa Hulanda cu nos ta mehorando nos control y supervision financiero, si e hechonan ta papia pa nan mes: despues di tres aña di e gobierno aki ainda no a elimina e problema di CAD aki, cu ta uno basico pa por mehora e control financiero den henter e aparato.

Nos mester yega na e conclusion cu busca lugar pa bay cu e personal menos bon diploma den e despachonan ministerial, ta hopi mas importante cu resolve e bottlenecknan cu ta stroba nos haya mas grip riba gasto di gobierno? Aki no ta cuestion di color politico, sino di interes di nos tur cu mester paga pa e fiesta di desperdicio por continua. Pero, por ta cu ta nos no ta comprende ‘prioridad politico’?

LEAVE A REPLY

Please enter your comment!
Please enter your name here