E siman aki a anuncia proyecto nobo pa locual ta encera carchi di Rijbewijs Arubano.
Prome Minister Evelyn Wever-Croes a gradici colega Minister encarga cu Husticia Andin Bikker pa tur esfuerso y input den e proceso y a duna gradicimento tambe na Directora di Censo, Sharin Luydens, y e departamento completo pa e trabou haci.
“No tabata un trabou facil. E la tuma hopi tempo y empeño pero esunnan envolvi tabata dedica na e meta na bienestar di eficiencia, mehoracion di servicio, baha gasto y un proceso /producto confiabel”, segun Premier Wever-Croes.
Desde 1 december 2020 e carchi di Rijbewijs Arubano nobo lo wordo traha door di Censo den mesun manera cu e proceso di Cedula ta tuma luga. Cu e proyecto aki kier percura cu e servicio na comunidad wordo agilisa (bira mas lihe/eficiente) y cu e producto cu e cliente ta ricibi (e Rijbewijs) ta uno cu ta conta cu tur regla di siguridad necesario.
“Cu esaki ta spera cu ta mehora e calidad di bida di e ser humano, poniendo e ser humano central manera cu Gabinete Wever-Croes a bin ta haci. Cortando e tempo di espera, e ciudadano por tin mas tempo pa dedica na otro cos. Por ultimo, ta gradici Censo y Cuerpo Policial y felicita pueblo cu e bunita logro”, Premier Wever-Croes a expresa.
