editorial 2_26.jpg

Gobierno no ta baha gasto di salario

Den e edicion di ayera nos a toca e puntonan mas importante di e conseho di CAFT riba e presupuesto 2016. Awe  nos lo elabora un poco mas riba cierto aspecto di e rapport aki. Awe nos lo bay un poco mas den detaye riba cierto aspecto. Un di e asuntonan ta e entradanan cu gobierno ta spera na 2016. Esaki ta basa riba loke pa 2015 ta spera di haya, y ta aki unda tin interogante, pasobra esaki no ta bayendo den bon direccion, manera nos a señala anteriormente den e seccion aki. Gobierno su entrada total, y su entrada di impuesto a cay den prome mita di 2015, y si e rumbo aki no cambia, aña ta bay termina cu menos entrada cu na 2014. Pakico esey? Gobierno no por compensa via su entrada adicional cu no ta impuesto? No, pasobra esey ta den su mayoria dividendo di e empresanan estatal propiedad di Pais Aruba. Na 2013 e empresanan estatal a contribui fuertemente cu dividendo, pero na 2014 esaki a baha considerablemente, y 2015 ta mustra den mesun direccion. Ademas CAFT ta señala cu tin varios empresa estatal den zona di riesgo cu ta haci cu gobierno lo mester apoya nan financieramente, si cos bay malo. Di banda di gobierno ta desmenti esaki, pero CAFT lo mester por sa algo cu nos no sa pa por bisa esey. En todo caso, un regreso na un nivel bastante halto di dividendo na 2016 no ta parce factibel, loke ta haci cu gobierno lo ta depende puramente riba entrada di impuesto, cu tambe ta stagnando den prome parti di e aña aki. Ta p’esey CAFT ta mustra riba e necesidad di aumenta entrada via introduccion di e ley nobo riba consumo ABB. Otro manera pa haci esaki ta naturalmente aumenta BBO, pero esaki di mes ta algo politicamente no recomendabel. CAFT ta recomenda pa introduci e ABB ainda prome cu pasa presupuesto den Parlamento, loke ta un poco straño, pasobra asina leu cu nos conocemento ta yega, e propuesta di ley aki no a ni bay pa Raad van Advies, cu ta ocupa te fin di november cu e presupuesto mes. Por lo tanto tratamento e aña aki lo ta sumamente dudoso.

Gastonan

Pa loke ta e capitulo di gasto, e item mas importante ta keda e gastonan di personal, cu ta como 50% di e presupuesto total. E motibo pakico mester concentra riba baha e aspecto aki ta no solamente esey, pero tambe e problema pa corta den e otro gastonan grandi manera interes y bienes y servicio. Interes riba prestamo lo keda subi y ta bayendo den direccion di mas di 210 miyon pa aña. Bienes y servicio den prome mita di 2015 tabata na un nivel di 110 miyon y si nada no cambia lo termina na e nivel di 220 miyon, igual cu 2014, pues aki no ta mira mehoracion tampoco. Realmente loke ta mira aki ta cu gobierno ainda ta flotando riba e exito di e reforma di e fondo di APFA, pero esey no ta suficiente pa yega na e suma cu mester corta, cu segun CAFT ta 90 miyon na 2016. Manera nos a yega di señala caba algun tempo atras, na 2014 gobierno hasta a bay paga mas na salario mes, mientras cu a gana un suma considerabel riba e reforma di APFA. Di e manera aki gobierno ta uzando e beneficio cu e tabatin cu e reforma di APFA pa sigui paga un payroll exagera, sin mester di baha gasto riba salario mes. E beneficio di mas di 50 miyon aki por sirbi pa keda paga aumento structural  di salario  por lo menos pa dos o tres aña, prome cu e gastonan total di personal ta bek na e nivel cu e tabata na 2012/2013, di practicamente 700 miyon. Parce cu esey ta e strategia pa no mester tuma medida mas drastico, manteniendo tur hende na trabao y bisando “aquí no pasó nada”. E otro item cu ta yuda gobierno bastante den drecha su balance sheet ta e di dos porciento pa BAZV cual a bin aden e aña aki y na 2016 lo significa un suma di mas di 120 miyon florin pa AZV, di manera cu gobierno practicamente no tin tanto mas di contribui na AZV for di su presupuesto. Mester desconta naturalmente si e dos porciento di prima menos cu no ta paga mas.

Proyecto PPP

Un preocupacion cu a keda pa CAFT ta tambe e pagonan cu gobierno lo mester presupuesta pa e proyectonan ‘PPP’ cu un cierto momento ta den un fase asina avansa cu e pagonan mester cuminsa sali. Lo bin un rapport separa riba e tema aki, asina ta nos por keda pendiente di esey. Di tur manera gobierno ta contempla keto bay e introduccion di e ‘bank transfer tax’ pa kita e responsabilidad aki for di su presupuesto, pero esey no ta kita cu e lo ta un peso extra pa nos economia. Resumiendo, tin hopi cos pa drecha pero aparentemente esey lo tuma luga despues di e siguiente buelta di guera anuncia.

 

LEAVE A REPLY

Please enter your comment!
Please enter your name here