(AFP) – Nvidia y mas di 30 compania di tecnologia a lansa un aliansa pa desaroya hermentnan di inteligencia artificial ‘open-source’ pa defensa cibernetico, enfrentando un lucha tocante e seguridad di modelnan di AI cu ta libremente disponible.

Open Secure AI Alliance – ken su miembronan fundador ta inclui Microsoft, IBM, Palantir, CrowdStrike, Cisco, Dell y Hugging Face – lo construi y comparti herment cu ekiponan di seguridad por evalua, modifica y opera riba nan propio sistemanan, e grupo a bisa den un declaracion.

E aliansa a surgi pa motibo di un incidente e luna aki na Hugging Face cu OpenAI a reconoce como e prome caso revela publicamente unda un model di AI a ehecuta un atake cibernetico di manera autonomo.

Yamando esaki “inespera,” OpenAI a bisa cu dos di su model a scapa di un ambiente di test, yama Sandbox, y a yega internet habri y compromete Hugging Face su infrastructura.

Hugging Face prome a purba investiga y para e atake usando modelnan di AI comercial lider, pero nan proteccion di seguridad a blokia e trabao, Nvidia a bisa.

E compania e ora a bay na GLM 5.2, un model habri di agencia Chines Zhipu (tambe conoci como Z.ai), pa contene e atake.

Cu un model Chines a mira exito unda esnan Mericano no tabata por a reinicia debate na Silicon Valley y Washington, unda legisladornan ta midiendo con pa combati uso di sistemanan di AI Chines den medio di un rivalidad cu ta keda bira mas intenso cu Beijing.

Silicon Valley ta ampliamente opone na cualkier tipo di limite, cu varios figura di e industria mirando limitacion na AI ‘open-source’ como un esfuerso pa inhustamente proteha OpenAI y Anthropic, e lidernan cu ta bende e modelnan di AI mas poderoso.

Anthropic, creador di e chatbot Claude, ta bao presion particular, mirando cu e tabata esun mas visible den expresa sosten pa e causa ‘open-source’ desde e incidente cu Hugging Face.

E aliansa a usa su lansamento pa urgi legisladornan trata modelnan habri como “bienes di defensa, no posible problema,” advertiendo cu restriccionnan por debilita defensa cibernetico y concentra poder den un cantidad chikito di proveedornan di AI cera.

Miembronan a priminti di comparti herment pa un defensa comun mas fuerte.

Nvidia a bisa cu e lo lansa modelnan habri, data y investigacion nobo tocante software di agente AI, mientras cu Microsoft a ofrece tecnologia cu ta yuda agentenan di AI haya cualkier eror den software.

Elon Musk su SpaceXAI a bisa cu el a usa agente di codigo di Grok y a priminti di publica e data di su modelnan di Grok.