Abeha rond mundo ta na peliger y na Aruba e no ta un excepcion. Pero e insecto valioso pa vegetacion y naturalesa en general tin un aliado grandi y su nomber ta Giles Maduro (33) di Fundacion Proteha Abeha Aruba, FPAA.

Giles ta conoci pa saca neishinan di abeha for di cas di hende y rescata e animalnan aki cu ta contribui na polinisacion di matanan, incluso esnan cu ta produci cuminda. E interes di Giles Maduro pa abeha a cuminza hopi trempan. Semper e tabata gusta naturalesa, inspira particularmente pa su welo Sixto Maduro. Sixto, un piscado, tabata hiba su nieto regularmente den mondi pa explora e naturalesa di Aruba. Y for di e momento cu Giles a perde su welo, como varios aña pasa, el a sinti su mes yama pa bira un protector di abeha, pa asina percura cu nan no ta desaparece di e naturalesa di Aruba y na mesun momento, percura cu naturalesa di Aruba no bay perdi. “Mi welo tabata hiba nos den mondi, siña nos di yerbanan cu hende ta usa como remedi.”

Na 2007, aunke Giles tabata hopi jong, el a dicidi pa enfoca riba e trabao cu abeha. Prome cu esey, su interes tabata den arte y fotografia. Pero pakico abeha? “Mi a sinti cu mi mester a haci algo pa e insectonan. Di hoben mi tabata busca un proposito. Si mi haci un trabao, lo mi mester hacie cu amor.” Algun hende ta sinti nan mes yama pa proteha por ehempel e rinoceronte, e ‘neushoorn.’ E lucha di activistanan pa purba salba e especienan unico di neushoorn a inspira e adolescente cu a cuminza educa su mes riba e habitat, comportamento y necesidad di e abeha na Aruba. “E ta e yabi principal pa naturalesa rond mundo y mi a tum’e hopi na serio.”

Ora cu a papia cu Giles Maduro, net el a caba di saca un colonia di abeha for di un cas, pa despues hiba nan na un cunucu di un agricultor, un hende di edad caba. Eynan el a haya oportunidad pa combersa cu e cabayero cu kier a cont’e di su mesun trabao. Tabata otro oportunidad pa Giles por a siña mas di hende mas adulto cune y aprecia e trabao cu ta bay den plantacion. Y ta netamente aki ta unda abehanan tin un papel importante pa hunga.

El a siña su mes hopi trempan con pa rescata colonianan di abeha cu ta bao stress of cu a cuminza invadi cas na Aruba. Cu mas habitante na Aruba, mas desaroyo, ta nifica menos espacio di mondi pa e insectonan aki. Y cu un clima cu ta birando mas calor y mas seco, mas y mas abeha ta buscando refugio den barionan residencial.

Resultado ta cu Giles y ta continuamente activo ta saca e colonianan di abeha pa hinca nan den un caha special y asina ubica nan unda nan por ta sigur.

Giles por ta considera ‘self made.’ En todo caso, el a busca tur informacion necesario online, y a siña su mes. “M’a tuma curso tambe na Colombia, pa sa mas di abeha y riba nan bida. Ora ta cuminza riba bo mes, no sa mucho kico ta e desaroyonan. Por ehempel, antes mi tabata huma den cas pa saca e abehanan. Pero awendia mi no ta hacie (hopi) pasobra locual mi siña ta cu huma por kima nan hala y hasta nan wowo. Pues awor, cu mi ta traha cu abeha, mi sa con pa duna nan miho trato.”

Giles Maduro tin dos caha di abeha su mes. E no tin mas pasobra e ta biba den un bario residencial y “no por tin hopi caha den bario y tin dia abehanan por lanta loco.” Giles no ta saca honing di e abehanan, pasobra e no kier stroba e proceso natural di e insecto. “Nan mester di e wax pa nan come.” Nan ta traha esaki pa e colonia por sobrevivi. Pero si e mester haya un colonia na un cas di hende cu ya a traha wax, e ta saca e honing pa hiba pa e doñonan di cas. “Esey nos ta bende e ora pa recauda fondo pa e fundacion.”

 

Abeha en general no ta agresivo. Un reina nobo cu ta sali cu su abehanan, su ‘swarm’ ta sali hopi calma, pasobra tur ta bon comi. Ora ta trata di un ‘swarm’ di abeha, esta e nubia di abeha, mayoria biaha nan ta buscando cas. E momento ey, por yega cerca sin proteccion di curpa of cara. “Pero tin hende ta cay den panico ora ta mira un nubia di abeha ta yega nan cas. E ta un reaccion natural. P’esey nos kier enfatisa cu ora cu un nubia di abeha yega na un cas, pa keda trankilo pasobra nan ta djis bay sosega. Pero, ora ta un neishi di abeha cu ta existi pa mas tempo, cu ya nan a cuminza traha nan wax, por papia di un colonia cu ta defensivo. Esey ta ora cu mester tene cautela, pa no haci mucho desordo, no cana cu colonia of spuit cu insecticida. Tur eseynan lo ‘trigger’ e abehanan, cu por haci nan agresivo. Como tal, e ta consehabel pa saca tur e wax, e reina y e abehanan for di cas di hende. Y con Giles ta reconoce e reina? “E abehanan ta baila den un circulo. Abehanan ta bosha riba e reina, y e otronan ta cuminza cana rond di e bol di abeha pa cera mas. E reina ta saca holor pa yama abeha, ta saca holor di atake y pa abehanan busca cuminda.”

Hopi cunukero ta traha caha pa abehanan por biba riba nan tereno. Giles no ta los e ‘swarm’ sin mas, pasobra e luga mester ta berde y fresco y leu di cas. Abehanan ta den peliger pasobra awa no ta yobiendo, no tin hopi mata cu flor y e calor ta inmenso. “Nos ta hayando neishi cu simplemente a sofoca of cay den depresion y nan ta muri.”

Den e dianan aki ta hopi calor, cu ta nifica mas trabao. Algo cu Giles ta contento cune. Su ambicion ta pa stabilisa e populacion di abeha na Aruba y despues, comparti su conocemento cu mundo.

LEAVE A REPLY

Please enter your comment!
Please enter your name here