Campaña electoral, cu a cuminza na un manera timido den ultimo lunanan, awor si a bay den overdrive. Tur cos cu tabata planifica pa tuma lugar a lo largo di e mey aña cu tabata separa nos di dia di eleccion, mester keda hinca den un programa mas preta. Basicamente esey ta un problema pa e partidonan, pa e ciudadano ta mas interesante con nan ta bay campaña na un manera safe, sin trece nos den problema causando brote di Covid-19, manera ta e caso na nos hermana isla, unda 500 caso nobo riba un dia, algo teorico cu awor a bira realidad. Esey ta trece cune cu mester exigi cierto madurez, un delito di cual poco di nan a ser acusa te awor. Pero ban ta optimista, ademas cu nos mes t’ey pa huzga, y condena, si ta necesario.

E punto mas interesante ta loke nan ta bay trece pa gana voto cune. Banda di e puntonan di contenido sin duda algun nos lo haya e yamado di ambos partido grandi cu nan kier goberna nan so… Nos lo tende e mesun argumentonan di semper, cu goberna cu un partido chikito ta duna demasiado problema, nan exigencia no ta segun nan tamaño, y cu ora nan haci cos imposible, nan kier haya razon toch. Esey sigur nos lo haya di tende di e partido grandi actualmente demisionario, cu lo bay bisa cu “awor si definitivamente nos no kier goberna mas cu partido chikito; nos ta desea un mandato pa goberna nos so”. Asina nos por sigui skirbi henter un litania cu por sirbi como base pa un discurso di un di nan, pero como cu nos no ta gana placa cu e actividad ey, nos ta lag’e te ey.

Pregunta cu ta keda ta si en berdad un gobierno di un solo partido ta resulta mihor cu un di coalicion. Den nos caso, 35 aña ta suficiente pa pone nos propio experiencia conta nos kico ta kico. Nos a pasa den varios gobierno di coalicion den añanan 80 y 90, no un tremendo experiencia, te cu na 2001 pa promer biaha nos a haya un gobierno unipartidista. Nos a keda encanta cu nan prestacion? En todo caso nan a sobrevivi e promer evaluacion na 2005. Cuatro aña despues si no tabatin awa pa laba, a bin otro gabinete tambe di un solo partido. Esaki tambe a sobrevivi su promer ‘examen’ na 2013, cu broche de oro ademas, yegando na e representacion mas grandi cu cualkier partido den parlamento. Cuatro aña despues mas di 10.000 votador di 2013 a dicidi di vota otro, o no vota pa e partido den gobierno. Si nos bay evalua ta cual gobierno, di coalicion of no, tabata mas dañino pa Aruba,anto e distincion entre coalicion o gobierno so ta bira irelevante, pasobra sigur den sentido financiero tin un cu a bay cu e premio mayor den e categoria aki.

Y ban ta franco, tin tanto diferencia entre un partido chikito cu ta ‘echa baina’den gobierno, o si ta trata di miembro di e partido grandi mes? Si ta di e partido chikito, e miedo pa gobierno cay ta asina grandi cu no ta haci nada, manera nos por a mira den e gobierno mas reciente aki. Y si ta un discipulo di e partido grandi mes, loke nos por a mira cu ta defende e persona te na ultimo. Nos por a mira esey den e penultimo gobierno cu no kier a laga apoyo na nan ministro bao investigacion cay algun aña pasa, y tampoco e siguiente cu tambe ta bao investigacion penal na e momento aki. Contal cu nos como Aruba tin e tremendo track record di tres (ex-) ministro bao investigacion penal, di ken un ta condena caba den promer instancia. Ta posible pa bisa cu delincuencia ta mas un caracteristica di un forma di gobierno of e otro? Nos ta kere cu mas bien nos mester busca e origen di e problema di delincuencia di nivel halto, no den e forma di e gabinete, sino den e deterioro di norma y valor den nos sistema di gobernacion. Y esaki tin di haci tambe cu e falta di control en general cu a crece a traves di añanan, tambe, y esey mester bisa, bao presion di banda di politico, cu mas cu un biaha ta kere cu ley ta algo pa esun cu ta na poder kibra. Ademas, delincuencia den gobernacion no ta algo exclusivo di esnan den puesto politico, sino di cualkier persona den e aparato gubernamental cu ta cay pa e tentacion di maluso di poder y oportunidad. Mira di e manera ey no tin otro forma di ataca e cancer di delincuencia aki, cu no ta creando control riba tur proceso den gobernacion, pa cuminza cu e procesonan relaciona cu permiso.

Resumiendo, ta posible indica diferencia clave entre diferente tipo di gabinete? Nos ta kere ta mas importante pa enfoca riba kico partidonan ta trece dilanti, no na intencion so, pero con nan ta cuminza combati e malesanan aki, sigur den nan propio seno. Aki por ehemplo nan por duna un bon ehemplo, cuminzando cu pone debido control, segun normanan nobo di e ‘Boek 2’ Codigo Civil nobo, cu su reglanan mas estricto pa e cantidad di fundacion cu e partido y politiconan tin.

LJMADURO – 31-MRT-2021

LEAVE A REPLY

Please enter your comment!
Please enter your name here