Gobierno demisionario a apunta un grupo di trabou, asisti pa profesornan experto riba e tema di Statuut pa sinta cu Hulanda pa yega na un reformulacion di e ley pa COHO, e organo di reforma y desaroyo. Pero mientrastanto, a firma pa e di dos agenda di ehecucion pa asina por sigui ricibi sosten di likides. Asina Prome Minister Demisionario Evelyn Wever Croes a informa Parlamento ayera.

E encuentro informativo a tuma luga net despues cu Minister di Finanzas Xiomara Maduro a haci entrega Presupuesto 2021 na Presidente di Parlamento Juan ‘Ady’ Thijsen. Por cierto, e presupuesto, cu ta algun luna laat, a keda presenta den forma digital y tur Parlamentario a ricibi un usb cu tur documento relevante.

Deficit ta ilustra necesidad di sosten di likides

Y e presupuesto presenta ta mustra un deficit di 877 miyon florin pa 2021, cu ta motibo tambe pakico Aruba mester di e sosten di likides di Hulanda. Y pa por ricibi e sosten, mester a acepta e landspakket y cumpli cu condicionnan cu ta poni den e agenda di ehecucion.

Dialuna ultimo a firma e di dos agenda di ehecucion cu practicamente ta dilema fechanan cu analisis y investigacionnan mester ta cla pa asina cuminsa implementa reformanan, cuminsando den e di tres kwartaal di 2021.

Evelyn Wever Croes a splica cu a pesar di tur cos, Aruba a cuminsa nota mehoracion, y IMF mes a duna un evaluacion positivo. “Hulanda ta positivo con Aruba ta cumpli cu condicionnan.” Pero, a bin e conseho di Raad van State, Wever Croes a señala. “Raad van State a bisa locual nos di Aruba a bisa. Nos a institui nos comision pa renegocia, pasobra no por ignora e conseho di Raad van State.”

Sinembargo, realidad ta cu Aruba tin necesidad financiero y Hulanda ta e unico cu por yuda na e momentonan aki. “E tabata hopi trabou pa a yega na e di dos agenda di ehecucion, pasobra nos tin capacidad limita di profesionalnan, cu ademas di esaki, mester haci nan trabou diario. No obstante tur cos, Aruba ta cumpli cu condicionnan di Hulanda, pero mester negocia cada punto di agenda na un forma realistico cu Hulanda. Pa esey mester keda na mesa.”

Den concepto di Prome Minister Demisionario, e ta cumbini Aruba pa e relacion cu Hulanda keda trankilo pa asina por sigui haya sosten. “Ta na mesa mester keda sinta, den forma firme, pa bringa pa nos pais.”

Gelijk hebben no ta gelijk krijgen

Andin Bikker, Minister Demisionario di Husticia tambe a subraya e conseho di Raad van State cu a bisa cu aunke cu Hulanda por mara condicion na e sosten di likides, e rijkswet di COHO ta bay hopi leu y ta mishi cu responsabilidad autonomo di e paisnan den Reino. Segun Bikker, Raad van State a bisa cu mester bolbe na mesa y como tal, e grupo di trabou cu ta consisti di personal di Direccion Huridico y Asuntonan Legislativo, DWJZ hunto cu algun profesor di ley lo negocia cu Hulanda. Pero e ta un poco frustrante cu pa motibo di no tin un instancia pa dicidi riba disputa, no por spera mucho. “ ‘Gelijk hebben’ ta diferente cu ‘gelijk krijgen’,” Bikker a señala, ilustrando cu aunke constitucionalmente Raad van State tin tur rason den su conseho, e ultimo aki no ta mara Gobierno di Hulanda y ta Tweede Kamer ta dicidi. Y Aruba no tin representacion den Tweede Kamer. “Lamentablemente, door cu ta depende di sosten di Hulanda como e unico avenida, pa e subsidio tras di subsidio, nan ta keda mara na condicion. Y na final di dia, Gobierno mester percura cu e pais ta sigui draai. Sinembargo e ta satisfactorio si cu Raad van State a reefirma locual Aruba a bisa Hulanda ) riba e consensus rijkswet),” Bikker a comenta. “E frustracion ta cu si e conseho ta mara Hulanda si of no. Pero e realidad ta cu mester atende cu nos pais, cu ta den un pandemia y cu ta depende di un avenida so pa haya sosten financiero. Y no obstante e conseho di Raad van State, mester sigui cu e landspakket cu ta e condicion pa ricibi sosten di likides. “Ningun partido lo por carga cu e poblacion di Aruba si keda sin e sosten aki pa motibo di no kier cumpli cu e condicionnan,” Bikker a mustra.

BTW ta bira un hecho

Un informe cu sigur a yama atencion ta e hecho cu Aruba lo introduci BTW of un structura similar. Minister di Finanzas Demisionario Xiomara Maduro a bisa cu IMF a retira e necesidad pa cambia e sistema di impuesto y e ta describi den e landspakket tambe. Como tal, lo elimina e sistema actual di BBO y lo pasa pa BTW, cu ta un cifra acumulativo di tur e impuestonan indirecto cu ta cobra den un solo biaha. Maduro a enfatisa cu no mester kere cu esaki ta nifica aumento di belasting indirecto sino cu e sistema ta cambia. E lo no sosode e aña aki, pero lo por keda introduci na 2022, despues di duna preparacion na tur empresa pa ta cla pa un BTW.

Revision di Enseñansa

Un Minister Demisionario satisfecho ta Rudy Lampe, kende a bisa cu Inspeccion di Aruba hunto cu esun di Hulanda lo haci e revision di enseñansa di Aruba pa determina e puntonan vulnerabel. For di comienso di su funcion, e tabata kier un revision asina y a acerca Inspeccion di Enseñansa di Hulanda pa haci e trabou aki. Pero Aruba no tabatin e fondonan pa paga. Y awor, e trabou aki ta forma parti di e landspakket y como tal e ta contento cu e ta bay tuma luga.

Aruba ta inverti hopi den enseñansa y hendenan ta traha duro, pero pa un of otro motibo e rendimento no t’ey. Te ainda Aruba ta cana dilanti den muchanan cu ta keda sinta den e prome aña escolar y ta keda atras den e cantidad di persona cu tin un estudio na nivel HBO of mas, compara cu resto di region, pa no papia di Hulanda y e pais top na mundo, cu ta Israel. “Na Aruba como tres porciento di esunnan naci aki tin un diploma na nivel di HBO of mas halto. Na Israel e ta 45 porciento. Esey ta mustra cu nos sistema di enseñansa no ta duna nos e resultado cu nos kier.”

Formacion Social pa hende muhe

Ademas di observacionnan riba e conseho di Raad van State, diferente Minister a splica con cada Ministerio ta para pa cumpli cu e di dos agenda di ehecucion pa e landspakket. For di Finanzas, unda ta bay reforsa e capacidad di control di Algemene Rekenkamer y CAD, te na agilisa e proceso di permiso na Departamento pa Asuntonan Economico y di Industria y DWJZ, pa elimina burocracia, y asina stimula economia.

Minister di Asuntonan Social y Labor Glenbert Croes a mustra cu e Codigo Civil nobo ya caba a tene cuenta cu flexibilisacion laboral, pa asina por agilisa e proceso pa retiro. Sinembargo, hunto cu n’e ta trahando riba un base pa percura cu e trahado no keda den bashi. E ta implica e creacion di e instrumento Fondo di Asistencia Social di Emergencia, cu hunto cu cursonan di recapacitacion lo mester yuda e trahado Arubiano bolbe den e proceso laboral. E Minister Demisionario en todo caso ta contento cu e prome grupo di hende muhe ta bay forma parti di e Proyecto di Formacion Social cu ta tuma luga na Marinierskazerne cu ta brinda e participantenan e habilidad y disciplina pa despues por enfrenta retonan den bida na forma exitoso.

LEAVE A REPLY

Please enter your comment!
Please enter your name here