Atencion na hobennan y medio ambiente, ademas di reforma fiscal ta obhetivo di Gobierno

Democracia no ta perfecto, pero ta e mihor sistema cu paisnan occidental a adopta pa ordena nan podernan ehecutivo y legislativo. Institutonan y ciudadanonan ta yuda mantene e completo aki den balansa constantemente. Esaki ta locual Su Excelencia Gobernador Alfonso Boekhoudt a bisa na ocasion di apertura di Aña Parlamentario 2021-2022.

Gobernador a dirigi hopi atencion na Dia Internacional di Democracia, cu ta awe, 15 di September proclama pa Asamblea General di Nacionnan Uni. E dia tin como meta pa promove y sostene e principionan di democracia y den su discurso Gobernador Boekhoudt a papia di e procesonan democratico na Aruba, incluso e derecho di voto liber.

Fortifica democracia

Es mas, e expresion di pueblo ta refleha den Parlamento, Sr. Boekhoudt a continua. Locual tambe el a enfatisa ta cu e pandemia a trece desafionan pa estado di derecho, unda a pesar di medidanan no por a restringi Parlamento pa eherce su poder democratico. Asina a logra tene un eleccion exitoso a di COVID-19. Mester defende y proteha democracia, cu ta un balans entre poder y servidumbre, “entre autoridad y consenshi social,” Gobernador a bisa, agregando cu tin biaha Gobierno a parce di a limita cierto libertadnan, pero pa proteccion contra un enemigo inespera y invisible manera un pandemia. En todo caso, e compromisonan cu mester a haci lo keda tema di analisis internacional, “E pandemia a siña nos lesnan cu por sirbi nos pa mehora y fortifica nos democracia. Nos a siña por ehempel cu solidaridad ta esencial pa tin un stabilidad den nos sociedad. Un pueblo solidario no ta bringa unicamente pa su propio interes, pero ta tene debido cuenta cu e libertad y interesnan di su prohimo tambe,” Gobernador a bisa. “Pero tambe tin lesnan cu nos no a caba di siña, entre otro, e hecho cu nos mester traha riba confiansa mutuo como pueblo. No solamente pueblo mester tin confiansa den gobernacion, pero gobernacion tambe mester tin confiansa den profesionalnan y miembronan di nos comunidad cu tin interes general na pecho, manera maestronan, esnan cu ta brinda cuido y esnan encarga cu orden publico.” Gobernador a bisa cu na momento cu ta cuestiona nan profesionalismo, ta atacha e ordo legal democratico, ademas cu mester ta cauteloso pa mina institutonan cu t’ey pa garantisa e balans democratico.

Oportunidad

Su Excelencia a bisa cu den aña parlamentario cu a habri ayera, Gobierno y Parlamento lo sigui traha riba oportunidad y posibilidad cu e pandemia ta ofrece. Lo sigui fortifica pilarnan di democracia, basa riba structura transparente, responsabilisacion y bon gobernacion. Gobierno, pa medio di Gobernador a bisa di tin e compromiso pa sigura implementacion di e proyectonan y iniciativanan pa aumenta transparencia y combati corupcion y pa implementa un plan integral riba e maneho di integridad di acuerdo cu e mihor practicanan den Reino. Lo introduci y aplica na un forma activo e Sistema Nacional di Integridad di e organisacion Transparency International.

Ademas, Gobernador a amplia riba e necesidad di diversificacion economico, unda lo basa esaki riba e seis sectornan prometedor, cu ta inclui sector agricultor, economia circular y industria creativo. Pa loke ta e sector di agricultural, “Gobierno a mira un aumento di interes pa e sector aki y e posibilidad di innovacion cu tecnologianan moderno contribuyendo asina na un desaroyo economico sostenibel.” Un turismo sostenibel, reformanan fiscal tur lo mester yuda economia di Aruba.

Sosten di Hulanda

E sosten di likides di Hulanda a yega 900 miyon caba, y aunke cu recuperacion economico a cuminza, Aruba lo no yega pronto na presupuesto balansa. Lo mester mas sosten di Hulanda. Pero e recuperacion economico y reformanan lo contribui pa sali di e retonan financiero -economico, Gobernador a sigui bisa.

A enfatisa e Plan di Desaroyo Teritorial cu Regulacion, ROPv, cu mester guia e desaroyo teritorial di Aruba pa complementa e infrastructura fisico sin haci mucho daño na medio ambiente. “Cu e meta pa busca un balansa entre desaroyo economico y proteccion di nos naturalesa y medio ambiente, otorgamento di tereno lo conoce un proceso transparente y husto pa e ciudadano.”

Dump di Parkietenbos

Gobernador Boekhoudt tambe a toca e tema di dump di Parkietenbos y a bisa cu Gobierno lo tin un maneho specifico pa yega na un solucion permanente pa e proceso di separa, procesa y reduci desperdicio, tanto solido como likido. Esey mester conduci na saneamento di e dumpnan na Parkietenbos y Sero Thijshi, como tambe restructura e sistema di plantanan di tratamento di awanan sushi na Bubali. “Un maneho ambiental duradero ta solamente posibel si e comportacion humano ta corecto. Esencial den esaki ta educacion y conscientisacion, cuminsando for di tempran na scol,” tabata e mensahe di Gobernador, kende ademas a urgi pa tur hende atene nan mes na leynan. “Aruba tin mester di sistemanan di gestion publico den cua tur esnan responsabel, nos institutonan, organisacionnan publico, semi- publico y priva, ta duna cuenta y ta tene nan mes na nos leynan,” Gobernador Boekhoudt a bisa den Parlamento ayera.

Atencion na hoben

Lo traha na interes di derecho di mucha, adultonan mayor y esnan cu capacidad limita. Ademas cu mester traha cu organisacionnan pa combati criminalidad hubenil, violencia domestico y abuso sexual, particularmente contra mucha cu ta keda alarmante. “Un pueblo cu ta mira husticia prevalece, ta experiencia esaki como un recompensa di democracia,” Gobernador Boekhoudt a mustra, ilustrando cu enseñansa, deporte y cultura mester brinda perspectiva, for di fase trempan, pa mucha y hoben. “Lo haci tur esfuerso pa crea un ambiente mas sigur cu un plan di accion mas agresivo den prevencion di criminalidad invertiendo mas den cuerponan di orden publico y dunando nan e hermentnan necesario pa por combati criminalidad efectivamente. Gobierno lo evalua solucionnan preventivo.” Gobierno lo amplia e poder investigativo di cuerpo policial pa hisa eficiencia y lo optimalisa e maneho strategico di KIA, e instituto coreccional cu programanan dirigi na resocialisacion di e presonan.

Salud publico

Pa garantisa salubridad publico a rekeri hopi esfuerso cu e diferente olanan di infeccion cu Aruba a conoce, Gobernador a sigui .Aunke tin esfuerso pa baha gasto, cuido medico adecuado y di calidad ta keda punto di salida. “Lo promove un cooperacion mucho mas estrecho entre hospitalnan di Reino. Conhuntamente lo haci e compra di medicina, material y aparatonan y fortifica e cooperacion entre e prome y di dos liñãa di cuido. Ademas lo sigui enfoca pa hisa e tasa di vacunacion contra COVID-19 pa asina Aruba por recupera.”

Cu asistencia di PAHO y gruponan di interes a realisa un Plan Nacional di Prevencion pa asina promove un miho cuido medico y un miho calidad di bida. Lo introduci un plataforma digital pa registra indicadornan di malesanan no-transmisible, cual ta e causa principal di morto prematuro aki na Aruba. Hunto cu e instancianan concerni, lo prepara un plan integral pa brinda asistencia, guia y cuido na e adulto mayor, pa asina garantisa cuido responsabel y di calidad, tabata e mensahe.

Enseñansa

Educacion y creacion di acceso na informacion pa hobennan ta esencial y Gobierno lo acelera innovacion den educacion, ehecutando e Plan Nacional di Enseñansa 2030. “Lo evalua calidad di enseñansa y sincronisacion cu mercado laboral y hunto cu sector priva lo implementa e programa ‘Enseñansa di Segundo Oportunidad’ caminda ‘dropouts’ por sigui studia of siña un vocacion practico, di acuerdo cu e mercado laboral pa asina por ta ciudadanonan digno y exitoso,” Gobernador a ilustra.

E Hefe di Gobierno y Representante di Rey a finalisa su discurso pidiendo pa union di Aruba, a di diferencianan. Pasobra union lo yuda Aruba progresa. “Trahando hunto nos ta mas fuerte, nos por logra solucionnan duradero y sostenibel. Union no ta nifica cu nos mester pensa mescos. Cada ciudadano tin talentonan unico, cu tin un balor special, cu ta diferente di otro, pero conhuntamente lo haci Aruba progresa,” tabata e peticion di Su Excelencia Gobernador Alfonso Boekhoudt.

LEAVE A REPLY

Please enter your comment!
Please enter your name here