E terorismo contra personanan cu ta protesta e molester di UTV ta continua na Malmok. Malhechornan tine specificamente contra personanan cu abiertamente ta pidi Gobierno pa tuma paso contra e molester di UTV.

Particularmente Rona Coster, e columnista popular cu tin hopi tempo ta skirbi contra e molester di UTV a bolbe bira victima di tiro. E biaha aki a tira bala den e bentana di su oficina. Esaki despues cu Diadomingo a tira riba bentana di su auto, cu tabata para dilanti di su cas. Otro bisiña a haya tiro di e mesun tipo di bala, cu a pasa den bentana di cas, hera dal un mucha. Esaki tabata den fin di siman. Ta trata cas di un señora di edad halto. Pero obviamente esnan cu ta ehecutando e atakenan aki no ta preocupa kendenan nan ta menasa, pasobra ayera tambe a dicidi di basha un transhi abou. Un cura di piedra cu ta traha desde 1978, y ta pertenece na cas di un señora kende tambe ta urgi Gobierno pa actua contra e molester di UTV pasobra nan no tin paz mas na nan cas.

Prome Minister Wever Croes

Bon Dia Aruba a tuma contacto cu Prome Minister Evelyn Wever Croes kende a institui un comision pa atende cu e problematica di UTV. Un di e miembronan di e comision ta Director di ATA, Ronella Croes kende a bisa cu tin un conseho cu algun paso concreto cla pa entrega Gobierno nobo. Banda di esey lo (sigui) traha riba maneho. Director di DOW ing. Marlon Croes tambe ta forma parti di e comision amplio y a haya instruccion di Prome Minister Evelyn Wever Croes pa atende cu e problema. Croes a bisa cu berdad te cu awor no tin ningun tipo di regulacion pa UTV, pero cu e no por bisa mucho cos ainda, pasobra ainda mester presenta e strategia na Gobierno pa haya aprobacion.

Reaccion Andin Bikker

Di su banda, Minister di Husticia Andin Bikker a bisa cu e atakenan ta bou investigacion di Cuerpo Policial di Aruba y tambe Ministerio Publico y tur instancia hudicial concerni. “lo aumenta vigilancia den e area na maximo alerta y instancianan hudicial lo haci todo lo posibel pa resolve e caso mas pronto cu por. Di parti di Ministerio nos ta trahando riba cambionan di ley pa regulacion mas severo riba e posesion di arma y implementacion di scanner portatil pa por controla vehiculonan y personanan na un forma mas efectivo riba posesion di arma,” Minister Bikker a bisa Bon Dia Aruba.

Riba e pregunta si ta considera e balanan cu a tira riba e casnan na Malmok, incluso e auto y oficina di Rona Coster cu parti di un arma blanco, e Minister a bisa di no por drenta den detaye di un investigacion andando. “Esey ta na discrecion di KPA of OM.”

E Minister demisionario a bisa cu en general, pa loke ta trata prevencion di maluso di aparatonan ‘airsoft’ ta trahando riba cambionan di ley y maneho. Esakinan pa restringi importacion, transporte, posesion y uso mara na permiso. Solamente un persona mayor di edad, cu tin prueba di bon conducta y cu ta miembro di un asociacion deportivo registra lo por pidi pa permiso. “E lo ta mescos con tin e armanan ‘airsoft’ regula na Hulanda,” Bikker a bisa.

Mientrastanto e Minister a tuma contacto cu un di e victimanan, esta Rona Coster kende

Miembro di famia di un di e victimanan a bisa cu e ta convenci cu esnan cu ta causante di e terorismo aki lo no stop te ora cu tuma paso firme. “Alomenos cu nan pone un polis 24 ora pa dia aki.”

Minister di Turismo Dangui Oduber a bisa Bon Dia Aruba cu ta ora pa regula e actividad di UTV pasobra mester yega na un balans. E titular na momento di a duna e declaracion no tabata na altura cu un biaha mas a ataca Rona Coster. Bon Dia Aruba lo tin su pensamento riba UTV den e proximo edicion.