Tabatin un deadline di 15 di juni 2020 pa gobierno di Aruba entrega su plan pa con pa introduci e reformanan necesario pa garantisa un mihor futuro den diferente sentido. A cumpli tambe y e documento a yega na man di prensa. Un resumen.

Den nan introduccion gobierno ta enfatisa primeramente e asuntonan cu lo mester haya un otro maneho. Pa cuminsa e economia actual cu ta demasiado orienta riba un solo actividad (turismo) lo mester haya un base mas amplio, pa por bira sostenible y pa limita riesgonan. “En corto: nos mester saca prosperidad di otro asunto banda di turismo di masa. Ta menciona den e informe atrobe e 6 sectornan identifica algun tempo pasa como ‘promising sectors’ cu ta: turismo, economia di conocimento, logistica, agricultura (produccion di cuminda) economia circular y actividad creativo.

Pa atende e limitacion cu balansa di pago ta pone mester tuma na cuenta dos actividad pa atende esaki: seguridad alimentario (food security) y dependencia di combustible fosil. Pa loke ta e produccion agricola (cu ta en realidad horticultura; red.) ta menciona emision acelera di tereno di propiedad publico, sin embargo ta haya falta di otro factornan necesario manera awa na prijs razonable y importacion na tarifa preferencial di insumo pa e sector aki. Den dependencia di combustible fosil ta atende e cambio cu mester haci den sector di produccion di energia (electrico) pero no ta menciona e otro uso di combsutible fosil: transporte.

Ta menciona innovacion como factor importante pa mehora clima empresarial y capacidad di competencia. Atrobe ta menciona e sector di horticultura como un sector cu por percura pa productividad y un cierto cantidad di cupo di trabao di nivel halto. Tambe ta bin dilant e institucion di SISSTEM (Sustainable Island Solutions through Science, Technology, engineering and Mathematics) na Universidad di Aruba y un fondo pa recuperacion y innovacion cu por percura pa iniciativa empresarial innovativo. Por lo demas ta menciona otro iniciativanan ya na caminda riba tereno di innovacion. Un plan nacional di innovacion tambe ta na caminda ainda, e informe ta señala.

Den simplificacion di e procesonan administrativo gubernamental cu por beneficia e operacion empresarial (From Red Tape to Red Carpet) ta trece dilanti e adaptacionnan den e leynan di establecimento di empresa y e ordenenza di permiso (Vergunningsverordening) unda ta bay tuma lugar un ‘streamlining’ cu por percura pa un tempo mas corto pa haya permiso pa start y opera un empresa.

Un factor grandi den apoyo na e reformanan ta ser duna na informacion digitalisa. Aki tin hopi trabao pa haci, entre otro legislacion cu falta riba tereno di privacidad pero tambe pa facilita trafico economico. Esaki por contribui na mas eficiencia den comunicacion den economia y tambe den comunicacion den y cu sector publico.

Mester atende e diferente debilidadnan pa por trece e resiliencia di economia na un nivel aceptable atrobe. Ta introduci e concepto “Verdienvermogen”. Esaki segun definicion di Wetenschappelijke Raad voor het Regeringsbeleid (WRR) lo mester ta “e suma di e potencia pa probecha oportunidad futuro y atende debidamente futuro menasa” y, segun e informe aki, ta encera aspecto manera e ya menciona resiliencia, capacidad di adaptacion y un actitud pro-activo. (Por lo tanto, un termino mas general cu ta cubri varios otro concepto cu ta ‘overlap’ otro, pa cual nos no ta mira tanto utilidad; red.)

Debe publico lo mester baha. E actual corelacion debe/GDP tabata demasiado halto pa por a absorbe e golpi actual. E sistema financiero no tabatin suficiente reserva pa por asisti den esaki. Tampoco gobierno tabatin reserva pa por yuda den un crisis di e alcance aki y por constata cu sector priva tampoco tabatin e reservanan loke a haci cu casi inmediatamente continuidad den sector priva a bira un problema tambe. Tampoco e empleado tabatin un ‘vangnet’ pa cay back ariba y ta na merced di otronan. Esaki ta ilustra suficientemente e necesidad di reforma, segun e documento.

Pa logra yega na controla debe publico mester di un reforma sustancial cu ta encera entre otro reduci gasto di personal y otro gasto operacional di gobernacion, garantisando un nivel adecua y deseable di facilidad y di inversion, pa por yega na un aparato publico eficiente. Tambe control di e gastonan di seguro social y e peso di e compromisonan colectivo ta hunga un papel.

Mercado laboral y gasto di personal

Ta indica tambe den e informe cu no por mira e gastonan di personal di gobierno separa di e aspecto di mercado laboral. Reforma den mercado laboral ta relaciona cu loke ta pasa riba tereno laboral dentro di gobernacion. Aki ta referi na e necesidad di pensa kico ta bay haci cu e personal cu lo mester sali for di servicio di gobierno y otro parti di sector publico. Lo mester bin un plan pa acompaña personal cu ta sali for di servicio publico pa bay traha den sector priva. Mester bin un plan pa medida di apoyo pa facilita empleo di ex-empleado publico den empresanan. Punto interesante: e informe ta pone como condicion pa futuro aumento salarial den sector publico cu e cantidad di cupo di trabao mester baha. Tambe e punto di e deseo di mas flexibilidad den legislacion laboral ta crea e necesidad di tin un tipo di ‘vangnet’ pa e empleado cu ta perde trabao pa por ofrece un cierto seguridad social. (Loke por hiba atrobe na aumento di ‘cost of doing business; red.).

Nota di redaccion:

Esaki no ta un resumen completo di e Nota. E texto completo lo ta disponible riba nos website: www. Bondia.com