Caft ta keda preocupa pa e nivel halto di debe di Pais Aruba y no ta mira ningun otro opcion na beneficio di e ciudadano, pa Gobierno haci lo maximo pa baha su deficit y crea surplus. Esey ta locual Profesor dr. Raymond Gradus a bisa ayera durante conferencia di prensa di College Aruba Financieel Toezicht.

E conferencia di prensa tabata oportunidad tambe pa introduci miembro nobo di Caft, e representante nobo di Gobierno di Hulanda, esta drs. Hans Hoogervorst, kende hunto cu e representante di Aruba, dr. Hellen van der Wal tabata a reuni cu Gobierno den e ultimo dianan.

Y a base di e reunionnan a dicidi pa duna Gobierno e dianan cu a pidi pa por contesta e carta cu dr. Gradus a manda dia 10 di Juni, unda a reitera su recomendacionnan pa presupuesto 2022, cu ta inclui un reduccion drastico di e deficit.

Manera ta conoci, CAft a mustra cu e debe ey ta insostenibel. “E debe di Aruba ta 5.9 biyon florin cu ta 105 porciento di e Producto Interno Bruto, GDP,” dr. Gradus a bisa. “Cada Arubiano tin un debe di 55 mil florin.” Locual CAft a enfatisa ta cu economia di Aruba ta brinda e posibilidad awor pa reduci e debe. Economia di Aruba ta recuperando. E crecemento economico na 2021 tabata riba 17 porciento, y Fondo Monetario Internacional IMF, ta premira un crecemento di cinco (5) porciento pa 2022. “Den e lunanan di April y Mei turismo a supera e nivel di prome cu pandemia di 2019. E crecemento economico aki lo mehora e efecto di COVID-19,” Gradus a sigui bisa.

Aruba mester probecha di e periodo di recuperacion aki pa pone su presupuesto na ordo. Ta imperativo pa Aruba sigui e recomendacionnan di Caft den e presupuesto aproba di 2022, reduci e deficit financiero na 2022 y logra un surplus di 1 porciento di e GDP den su presupuesto for di 2023,” Gradus a enfatisa. “Reduccion di e debe publico te na un nivel aceptabel ta sigui ta un tarea importante. Ademas, mester introduci reforma pa garantisa e sistema di seguridad social pa e generacionnan futuro.”

Sostenibilidad di debe

E panorama multi-anual, manera presenta den e presupuesto aproba di 2022, ta mustra cu e deficit financiero lo keda te y cu 2026. “Door di esey e debe publico nominal lo sigui aumenta den e proximo añanan. Entretanto interes ta sigui subi y ta preparando refinanciacionnan robusto. Ta esencial pa Aruba reduci su deficitnan, pasobra si no e gastonan di interes ta bira incontrolabel. Caft ta haya necesario cu mester reduci e deficit di financiacion e aña aki mes caba y cu for di otro aña lo tin un surplus di 1% di e GDP. Tambe sostenibilidad di e debe publico di Aruba ta haci esey necesario.”

Presupuesto 2022 y 2023

Pues, pa CAft, Aruba tin e posibilidad pa mehora su perspectiva di finanzas publico, pero mester tuma paso. Pasobra apesar di e cifranan di crecemento economico manera a señala, particularmente esun di 2021, cu 17,2 porciento, asina mes presupuesto di 2022 ta mustra un deficit financiero di AWG 236 miyon pa e sector publico , cu ta(4,2 porciento di e GDP di Aruba.. “CAft a haci recomendacion na e presupuesto di 2022, cu particularmente ta vigila control di gasto. E gastonan pa bien y servicio ta aumenta den presupuesto cu 22 porciento en comparacion cu e añanan di prome cu pandemia, mientras cu no ta splica suficientemente e necesidad di e aumento considerabel di gasto aki. E gastonan di personal y e contribucionnan di pais na e empresanan di gobierno tambe ta aumentando innecesariamente. Te ainda no a sigui e recomendacionnan di CAft, y door di esey por lo pronto e deficit di financiacion ta innecesariamente halto e aña aki,” Gradus a adverti un biaha mas.

Reforma fiscal

For di 2023 lo implementa un reforma fiscal, di cual introduccion di un IBA (BTW/VAT) ta un parti importante. E entradanan fiscal proveniente di e reforma aki ainda no a keda suficientemente splica den e presupuesto. Consecuentemente, no por determina suficientemente e grado di realismo di e entradanan fiscal. Mester señala cu e proceso legislativo di e introduccion no a cuminsa ainda. E hecho di no alcansa e fecha di introduccion previsto, esta dia prome di Januari 2023, lo tin un influencia negativo riba e cantidad di entrada fiscal y riba e saldo financiero na 2023.

Seguridad social y cuido

Reforma den seguridad social y cuido ta necesario pa garantisa sostenibilidad di e sistema pa e generacionnan futuro. Economisacion di AWG 60 miyon den cuido ta un prome paso pa cuido sostenibel y lo mester garantisa cu Pais Aruba no mester contribui a corto plaso pa compensa e deficitnan di AZV. Debi cu ainda no a formalisa introduccion di un contribucion propio y reduccion di e lista positivo di remedi, Aruba ta spera di no alcansa e obhetivo di economisacion aki di AWG 60 miyon na 2022. Sinembargo, ta di gran importancia pa ehecuta e medidanan di economisacion na termino cortico, Gradus ta bisa. Un retraso den introduccion di e medidanan aki ta conduci na perdida di economisacion. Den caso di falta di compensacion pa e perdidanan di economisacion aki, e resultado di AZV lo keda afecta negativamente, y cu esey e saldo financiero di Pais Aruba, den caso cu un contribucion nacional ta necesario pa compensa e deficit di AZV.

PPP

Proyectonan PPP tambe ta preocupa CAft. Aunke cu desde 2015 no a bin cu proyectonan PPP nobo, Aruba ta sinti efecto di un maneho cu ta pisa riba presupuesto. Por ehempel, e financiamento di Hospital dr. Horacio Oduber, HOH, ta a base di un construccion PPP y pa motibo di tardanza den construccion ta contribui cu Aruba mester paga 15 miyon adicional riba locual ta paga caba pa proyectonan PPP. Pues, e tardanza di HOH ta costa Aruba 15 miyon mas cu premira y riba dje ta basa riba un financiamento di 7 porciento. CAft a urgi Minister di Salud sr. Dangui Oduber pa traha riba e asunto aki.

Subsidio di salario

En todo caso, CAft a haya siguranza di SVB cu ta bay traha na cobra back e fondonan paga dimas na subsidio di salario durante e periodo di pandemia. “A paga 278 miyon florin na subsidio di salario, pero basa riba calculacionnan a resulta cu a paga 127 miyon dimas.” Gradus no ta culpa e empresanan sino ta bisa cu e proceso a bay hopi lihe pero cu awor mester paga back. Y SVB a sigura cu pa e aña aki lo cobra 49 miyon, na 2023 otro 30 miyon y na 2024 lo cobra 35 miyon. E resto di 127 miyon lo keda considera como perdida, ya cu ta premira cu algun negoshi lo kibra of sera prome cu por caba di paga tur e suma back. En todo caso, cu e areglo aki, e cantidad di recomendacion pa presupuesto 2022 a baha di 13 pa 12.

Maneho financiero

Pues, den opinion CAft, maneho financiero y e ciclo di hustificacion di Aruba no ta na ordo. Elaboracion di e cuentanan anual di 2019 y 2020 a sufri ainda mas tardansa, loke a provoca un retraso considerabel. E retrasonan aki ta resultado di deficiencia den e maneho financiero.

Durante e dos dianan na Aruba, CAft a haci un bishita na Aruba y a hiba combersacion cu Gobernador, Ministro di Finanzasay Cultura, Conseho di Ministro y e Comision di Finanzas, Organisacion Gubernamental, Cultura y Deporte di Parlamento. Tambe CAft a combersa cu Controlaria General (ARA) y cu e directoradonan di Banco di Seguro Social (SVb) y di Hospital Dr. Horacio E. Oduber (HOH).

Y mirando cu a duna Gobierno algun dia mas pa contesta e carta di dia 10 di Juni, CAft a mustra di no lo bay specula kico ta bay pasa of kico ta spera di Gobierno, tampoco e impacto pa e recorte di 12.6 porciento.

Bon Dia Aruba a tene un combersacion extenso cu Profesor dr. Raymond Gradus y den curso di otro siman lo publica esaki tanto riba nos pagina di Facebook como tambe como relato den corant.