Despues di e aprobacion di e cambionan den e ley di supervision financiero (LAft) di siman pasa, hopi tabata pendiente kico lo ta e proximo paso. Gobierno a acorda cu gobierno Hulandes cu e cambio di ley lo mester haya aprobacion den Conseho di Ministro di Reino prome cu e por bin na vigor, segun e protocol firma na november aña pasa.
Segun e medio NoticiaCla a logra haya confirmacion di Prome Minister Wever-Croes, cu tin deliberacion andando cu gobierno Hulandes. Esey ta parce logico tambe, mirando cu a pasa mas di un siman desde e aprobacion y e ley en todo caso no a keda firma pa Gobernador y e ministronan concerni, ni tampoco a aparece den Landscourant.
Segun e medio Koninkriijksrelaties.nu gabinete Wever-Croes tin un problema pa atende e asunto y ta parce cu e mandatario ta scoge pa pusha e asunto manda pa largo. Tambe nan ta di opinion cu ta sigur caba cu Conseho di Ministro di Reino lo no bay di acuerdo cu ta pone tanto Conseho di Ministro di Reino como CAft “buitenspel”.
Por observa cu den medionan tin algun confusion tocante e pregunta si e ley mester ta firma y na vigor pa por trata esaki den Conseho di Ministro di Reino. E protocol di november 2018 no ta bisa esey cu tanto palabra. E parti relevante den e documento ta bisa:” Entrada na vigor di e LAft mester tuma luga pa mas tarda prome cu 1 di januari 2019, pero no prome cu a yega na consenso den Conseho di Ministro di Reino.” Por lo tanto ta di comprende cu actualmente ta tuma deliberacion cu gobierno Hulandes tocante e contenido di e ley manera el a keda despues di e cambionan, pero sin termina e proceso cu firma di Gobernador y e ministronan concerni.
E proximo oportunidad pa trata e asunto aki den Conseho di Ministro di Reino lo ta dia 5 di juli, e proximo prome diabierna di luna cu ta e semper e dia di reunion di Conseho di Ministro di Reino.
