Comediante y studiante local, Jeffrey Maduro lo tene su stand up show na Crystal Theatre, dia 12 di juli. E ta actualmente studiando media, entretenimento y management na Leewaarden. E ta dedica tempo pa haci show di comediante.

El a cuminsa for di 2016, esey ta e prome biaha cu el a purba na un show di talento na Hulanda. For di hoben ta conoci pa haci joke, pero no den sentido cu e kier a pone riba scenario. Manera el a subi stage, e ta corda 400 hende den sala pa su prome biaha. “El a bay bon, mi a nota cu hende a gusta y a haci ami orguyoso den mi mes pa mi prome biaha.”

For di su prome experiencia, Maduro ta corda e candela a cende, pero el a keda trankil. Sinembargo, despues di luna el a bolbe presenta na un evento, el a ripara cu e ‘ta birando mas leuk, pero e tin reto su tras’.

Segun Maduro, reto cu cada bes audiencia ta cambia anto ta trece cune otro reto na dje, sinembargo el a dicidi cu a pesar di circunstancia, esey ta loke e ‘mi mester haci, mi pasion’. Na maart 2017 el a haci lo posibel pa tin su ‘one man show’. Maduro hunto cu su amigo a dicidi pa hacie, y na Papiamento pa respet di cultura. Su prome show como comediante na Aruba.

El a haci dos presentacion diferente anochi pa purba. “Mi a ripara hopi hende a keda keto, pero na Aruba ora cu bin cu algo nobo, esey ta pasa, pero mi a gosa y hende a duna mi feedback. Asina te cu mi a cuminsa skirbi mi otro show.”

Su siguiente show ta esun cu lo bay presenta na juli cu e titulo ‘A piece of my mind’. Tin algun cos cu mester ahusta, segun Maduro, pero ‘asina tur show ta’. Awo e idioma di su show lo ta Ingles.

Maduro a yega di presenta na varios ciudad di Hulanda. “Mi ta hacie na Ingles pasobra mi ta enfoca na audiencia, e ta mas facil pa yega na otro hende pasobra si mi hacie na Hulandes e ta limita. Tin e sentimento internacional y ta mas comodo tambe”.

A puntra Maduro con e ta haci confronta cu persona cu ta mas serio, of no gusta e joke cu e ta haci? E ta contesta cu manera e subi stage, ‘mi ta bay pa risk it’. E ta expresa cu e tin topico cu por ta vulgar y algun hende ta keda keto, sinembargo e ta aclara cu e no ta bay di mas cu su joke.

“Si mi hacie cuminsamento, e ta bira dificil. Hende por husga bo y lo corda bo semper djis pa esey. Pa e motibo ey, mi no ta haci di mas den un forma extremo”, Maduro ta splica. Locual a inspira Maduro pa bira un comediante ta pa conta experiencia di bida y transforma esaki den un manera ‘disfrutabel’ cu hende por gosa.

E ta sinti bon ora e ta mira cu hende ta hariendo y nan ta pasa bon. Pa nan sinti contento, tin cu por ta a caba pasa situacion dificil, anto esaki por haci cu nan humor ta cambia pa positivo.

Sinembargo, e ta agrega cu no ta tur ora e ta un comediante. “Na mesun momento, ora cosnan profesional mi ta estricto, pues e ta un escape pa mi mes, manera ningun hende no ta wak mi na comienso. Riba e escenario ta con normal mi ta cu hende cu mi conoce pa basta tempo.”

Dicon el a dicidi na Hulanda y no na Aruba pa ta un comediante? E ta contesta cu su trayectorio na Hulanda a cambia su persona con e ta presenta su mes. El a siña conoce mas hende y tuma iniciativa mas den comparacion cu na Aruba.

Mayoria di biaha den su experiencia na Hulanda tin mas oportunidad pa purba cierto cosnan, ‘mi no a spera cu esaki lo pasa’. A pesar cu e no a caba cu su estudio ainda, e ta haci su best pa por caba y asina dedica su tempo completo na locual e gusta haci.

A puntra Maduro cual ta e meta cu e kier logra den futuro? El a contesta cu pa awo e ta un Stand Up Comedian. E kier realisa su show den diferente pais y ciudad. “Unda cu mi haya caminda di book y hacie. Pero mi gol mas grandi pa mi tin mi mesun show riba Netflix, tanten djis cera contacto mas serio pa wak con leu ta pa otro aña.”

Sinembargo, pa awo Maduro kier ofrece manera comediante, na cada persona pa por pensa mas trankil den situacion serio, pa nan mente ta mas habri con hende ta anda cu bida actualmente. Pa nan sinti mas confortabel cu nan mes.

E tema cu e ta scoge ta cosnan cu por pasa den bida, of topico en general cu ta anda rond di mundo, pero mayoria di biaha experiencia. E show lo ta pa adulto 18+, menos cu esey mayornan tin cu acompaña nan yiu adolescente pa motibo di palabra malo. E show mes ta pa tur hende cu tin ‘sentido di humor’ of kier pasa bon un rato.