Gobierno di Sint Maarten ta carece di plan sostenible di cuido pa HIV

(TheDailyHerald) – Gobierno di Sint Maarten no tin un plan sostenible riba con pa duna cuido pa HIV den futuro, segun fundador y presidente di St. Maarten AIDS Foundation, Dr. Gerard van Osch, a bisa parlamento durante fin di siman.

Dr. Van Osch a duna un presentacion riba salubridad publico y implicacionnan financiero relaciona cu HIV/AIDS na Sint Maarten. “Nos mester evalua con gobierno no ta involucra den cuido y tratamento pa HIV na Sint Maarten”, Van Osch a bisa. El a agrega cu Sint Maarten tabata un di e prome paisnan den Caribe pa cuminsa cu tratamento pa HIV na 1992, pero awo ta e ultimo pais den Caribe unda su gobierno no tin un plan substancial con pa procede cu cuido y tratamento di HIV den futuro.

El a splica cu ofrece cuido y tratamento na personanan bibando cu HIV no ta un problema etico mas, sino un problema di salubridad publico. “Si bo no ta trata tur hende bibando cu HIV den bo comunidad, no solamente ta permiti pa morbilidad/malesa aumenta, sino tambe bo ta continua permitiendo e transmision di HIV den bo comunidad”, el a bisa.

E dokter a bisa parlamento cu na 2001, e gobierno e tempo aya a aproba un plan strategico di HIV/AIDS pa Sint Maarten. E management team pa programa di HIV, lidera pa Suzette Moses, a traha di 2022 te 2014.

Na 2014 a desaroya otro plan strategico, pero nunca a implementa esaki. Van Osch a bisa cu e plan strategico ey tabata contene e prome iniciativa pa gobierno bira mas involucra cu cuido y tratamento.
Tambe a desaroya un politica pa Sint Maarten na 2013, canalisa door di e Organisacion Panamericano di Salud (PAHO). El a bisa cu e plan aki tabata pa desaroya un standard di cuido di HIV/AIDS pa Sint Maarten. Van Osch a nota cu e documento aki por no ta actualisa, pero ainda por us’e como un base pa mira con e pais por bay dilanti.

E dokter a bisa cu St. Maarten AIDS Foundation a tene un reunion cu Servicio di Prevencion Colectivo (CPS) recientemente, durante cual e fundacion a menciona e politica prepara na 2013 na CPS y a logra duna e departamento un copia di e documento. “Desafortunadamente nos [red: e fundacion] ta pensa cu gobierno no a traha un plan con pa haci cuido y tratamento pa HIV sostenible na Sint Maarten”, Van Osch a bisa. “Gobierno ta bay tin cu dicidi si ta bay ofrece tratamento pa HIV pa tur persona, incluyendo esnan cu no tin seguro.”

El a bisa cu e ta bin ta duna tratamento na personanan sin seguro, kende ta biba cu HIV, desde 1990. Tin un presupuesto cu e fundacion ta aparta pa duna tratamento na 20 persona no-asegurado. Esaki ta conta pa alrededor di NAf. 100mil pa aña. Basa riba su calculacionnan, e costo durante bida pa un persona cu ta ricibi tratamento pa HIV, bibando un bida di duracion normal, lo suma hasta NAf. 464mil, cu e prijs actual di medicina/tratamento.

Van Osch a informa parlamento cu e ta bay ta bandonando e isla na october. El a bisa cu no ta un sorpresa pa gobierno cu e ta bandonando e isla. “Ta tempo critico pa nos bin cu un forma di solucion pa haci cuido y tratamento pa hendenan bibando cu HIV – tur hende, no solamente e aseguradonan – sostenible pa futuro”, el a bisa e parlamentarionan. “Tratamento pa tur ta un rekisito, e ta 100 porciento un asunto di salubridad publico, y ta ora pa nos mira e situacion aki y no djis mira riba Dr. Van Osch of AIDS Foundation pa resolve e problema aki”, Van Osch a conclui.