(AP) — Gobierno Hulandes temporalmente a desabilita su app di advertencia di coronavirus entre preocupacion pa privacidad di data pa personanan cu tin e app instala riba nan telefon usando e sistema di operacion Android.
Minister di Salud, Hugo de Jonge a anuncia diaranson atardi cu e app CoronaMelder lo stop di manda advertencia durante 48 ora mientras gobierno ta check si e data di e usuarionan ta safe.
E app ta usa tecnologia di ‘notificacion di exposicion’ desaroya pa Google y Apple cu ta genera codigonan aleatorio (‘random’) telefonnan por intercambia ora usuarionan ta cerca di otro pa un tempo suficientemente largo pa posiblemente transmiti e virus.
Ministerio di Salud Hulandes a bisa cu ta posibel pa otro app riba celularnan Android haya acceso na data tocante si un usuario ta infecta y su contactonan cu otro telefon.
“E privacidad di usuarionan semper ta un prioridad. Mientras Google mester resolve e problema, Mi por limita e consecuencianan. Ta p’esey nos ta tuma e decision aki”, De Jonge a bisa den un declaracion.
Mayoria di pais di UE a designa contacto usando app di tracing rond di e mesun tecnologia, segun Comision Europeo a bisa. E comisiona bisa cu a informa controladornan di appnan nacional den e 27 nacion di UE ‘pa asina Estadonan Miembro tuma e stapnan necesario si mester’.
Segun Ministerio di Salud, Google a informa gobierno diaranson cu a drecha e problema. Gobierno a stop mensahenan di e app durante 48 ora pa check si a drecha e leak.
Den un declaracion via email na Associated Press, Google a bisa cu tabata ‘lansando un fix pa un problema unda indentificadornan aleatorio di Bluetooth usa pa e marco di notificacion di exposicion riba Android temporalmente tabata accesibel na un cantidad limita di appnan instala previamente’.
E gigante di tecnologia a bisa cu e lansamento a cuminsa varios siman atras y ta spera cu e fix ‘lo ta disponibel na tur usuario Android den proximo dianan’.
Google a bisa cu identificadornan aleatorio di Bluetooth ‘riba nan mes no tin balor practico pa mal actornan, y ta extremadamente improbabel cu desaroyadornan di appnan instala previamente tabata na altura di e habilidad inadverti di e identificadornan aki’.
E compania a agrega cu no tin indicacion cu a haya acceso inapropia na ningun data di appnan di exposicion na coronavirus
