Dos dokter extra pa alivia sala emergencia

Minister di Salud Publico a anuncia cu nan kier un otro centro medico banda di hospital y Imsan. “Nos kier un centro medico adicional sea na Paradera, Piedra Plat of St. Cruz. Nos ta buscando un localidad pa esaki”, asina e mandatario Dangui Oduber ta bisa.

Nos ta buscando un localidad pa esaki. Nos ta den contacto cu minister di infrastructura pa wak ki terenonan tin disponibel pa esaki. Esaki tambe ta parti di e vision pa mehora cuido y duna hende atencion”, esaki e minister ta bisa durante un conferencia di prensa riba entre otro e scarsedad di dokter y specialista cu tin na Horacio Oduber Hospital.

Dos dokter extra pa alivia sala emergencia
Tambe el a anuncia cu lo tin dos dokter extra disponibel na hospital cu lo encarga pa trata cu pashentnan cu ta bini pa trato den sala di emergencia.
E meta di gobierno ta pa pronto alivia e presion aki cu tin na sala di emergencia y baha cantidad di oranan cu mester warda pa pashentnan wordo atendi segun e minister.

Minister Oduber ta bisa cu e enfoke di nan gobierno ta basa riba duna e hende atencion. Den manera cu bo ta haci esaki ta pa pone accion tras di bo palabranan segun e mandatario. Despues di un inventarisacion di parti di ministerio di Salubridad, a bin constata e cantidad di kehonan cu tin riba oranan largo cu pashentnan ta warda na sala di emergencia. Tin kehonan di hendenan cu ta warda cinco pa seis ora, segun e minister.

Gobierno a reuni cu directiva di hospital y AZV pa busca kico por wordo haci inmediatamente como gobierno pa baha e cantidad di oranan aki cu pashentnan mester warda. Diariamente riba averahe, sala di emergencia ta trata entre 100 y 150 pashent pa dia. Di e pashentnan aki, 30 pa 40 caso ta realmente casonan cu mester wordo trata cu emergencia. E otro casonan segun minister di Salubridad, por wordo trata pa por ehempel un dokter di cas of medico general. Esaki ta algo cu por keda cla dentro di un luna caba pasobra ta buscando e dos dokternan aki na momentonan aki.

Minister Oduber ta bisa cu ya caba gobierno a bin na un palabracion cu hospital y AZV cu lo bay cubri e dokternan di cas aki cu lo bin ofrece e servicio. “Anto asina aki nos ta cumpli cu nos promesa haci den campaña unda ta pone e ser humano central. Cu decisionnan asina pueblo por ta sigur den e caso aki cu cantidadnan di ora cu ta warda na momentonan aki sigur lo conoce un reduccion. AZV a duna un luz berde caba cu nan tin e fondonan disponibel pa cubri e dos dokternan di cas aki.”

Tin dos localidad e momentonan aki habri na hospital, y den e dos localidadnan aki AZV lo cubri dos dokter di cas. E dokternan aki nan tarea lo ta specialmente pa atende y asisti tur casonan di emergencia.